“Bolle Jos”, trafikanti holandez i kokainës, në qendër të hetimeve që zbulojnë lidhjet dhe përplasjet e rrjeteve ndërkombëtare të drogës
Dosjet hetimore nga Spanja, Holanda dhe Belgjika nxjerrin në pah një panoramë të gjerë të trafikut të kokainës, ku shfaqen edhe gjurmë të një organizate shqiptare.
Jos Leijdekkers, i njohur në botën kriminale si “Bolle Jos”, është dënuar në Holandë me 24 vite burg për përfshirje në trafikimin e afro 7 tonëve kokainë, një grabitje të armatosur dhe porositjen e një vrasjeje. Megjithatë, ai vijon të jetë në arrati. Autoritetet holandeze dyshojnë se fshihet në Sierra Leone, ndërsa për informacion që do të çonte në arrestimin e tij është vendosur një shpërblim prej 2 milionë eurosh.
Një prej episodeve më të fundit që e lidh emrin e tij me trafikun ndërkombëtar të drogës është dosja e sekuestrimit të 3.9 tonëve kokainë në portin francez të Dunkerkut. Sipas hetuesve, njerëz të lidhur me Leijdekkers dyshohet se ofruan 150 mijë euro për të marrë nën kontroll katër kontejnerë me drogë. Një punonjës i një kompanie transporti ka pretenduar se është kontaktuar përmes një videotelefonate nga vetë trafikanti dhe se, pas vonesave në realizimin e marrëveshjes, janë përdorur edhe kërcënime ndaj familjes së tij.
Hetimet shtrihen edhe në portin e Roterdamit, ku prokuroria holandeze dyshon se një ish-punonjës porti përdorte kontakte të korruptuara për të lehtësuar futjen e ngarkesave të kokainës. Ndërkohë, në Spanjë, një tjetër hetim çoi në sekuestrimin e mbi 30 tonëve kokainë në bordin e anijes “Arconian”. Sipas analizave të organizatës Global Initiative Against Transnational Organized Crime, Leijdekkers dyshohet se ishte koordinatori më i mundshëm i këtij transporti.
Në këto dosje shfaqet edhe gjurma shqiptare. Hetimi brazilian i njohur si “Hinterland” ka ndjekur aktivitetin e një rrjeti që autoritetet e lidhin me shqiptarin Armando Pacani. Sipas materialeve hetimore, organizata niste ngarkesa kokaine nga Brazili drejt porteve të Algecirasit në Spanjë, Vlissingenit në Holandë, Hamburgut dhe Antverpës. Pas sekuestrimit të disa ngarkesave, dyshohet se një pjesë e trafikut u zhvendos përmes Afrikës Perëndimore. Gjatë këtij hetimi janë sekuestruar më shumë se 17 tonë kokainë. Avokati i Pacanit ka deklaruar se klienti i tij është i pafajshëm.
Një tjetër dosje, në Belgjikë, lidhet me një ngarkesë prej 11.5 tonësh kokainë që mbërriti nga Sierra Leone në portin e Antverpës në vitin 2023. Për këtë çështje, Leijdekkers është dënuar në mungesë në maj të vitit 2026. Ndërsa në hetimin “Costa”, autoritetet kanë dokumentuar importimin e mbi 23 tonëve kokainë dhe gjurmimin e parave të përfituara nga aktiviteti kriminal, të cilat dyshohet se janë investuar në prona në Spanjë, orë luksoze dhe transferta financiare përmes Dubait.
Kështu, dosjet ndërkombëtare zbulojnë shtrirjen e rrjeteve të trafikut të kokainës, nga Amerika Latine në portet evropiane dhe deri në Afrikën Perëndimore. Në këtë hartë kriminale, emri i “Bolle Jos” kryqëzohet me hetimet për organizata shqiptare, ndërsa autoritetet vijojnë të zbardhin marrëdhëniet, bashkëpunimet dhe përplasjet mes grupeve që kontrollojnë një pjesë të trafikut ndërkombëtar të drogës.
Keni një histori? Denonco anonimisht, identiteti juaj mbrohet.
Denonco



