Irani i përgjigjet akuzave të Trump për armët biologjike dhe kimike: SHBA po përsërit skenarin e Irakut të vitit 2003

20 Nëntor 2026 | 08:46

Irani ka kundërshtuar akuzat e Shteteve të Bashkuara se Teherani mund të jetë duke zhvilluar armë biologjike dhe kimike, duke i cilësuar ato si një përpjekje për të përsëritur narrativën që parapriu pushtimin amerikan të Irakut në vitin 2003.

Zëdhënësi i Ministrisë së Jashtme iraniane, Esmaeil Baqaei, reagoi përmes një postimi në platformën X, ku vuri në pikëpyetje nëse Uashingtoni pret që bashkësia ndërkombëtare të harrojë pretendimet e paraqitura nga sekretari i atëhershëm amerikan i Shtetit, Colin Powell, në Këshillin e Sigurimit të OKB-së në shkurt të vitit 2003.

Në atë kohë, Powell paraqiti pretendime për ekzistencën e armëve të shkatërrimit në masë në Irak, të cilat u përdorën për të justifikuar ndërhyrjen ushtarake amerikane, të nisur një muaj më vonë. Këto pretendime u diskredituan më pas, pasi nuk u gjetën rezervat e armëve të deklaruara.

“Edhe një herë, me sa duket, bota pritet të vuajë nga një periudhë amnezie kolektive”, deklaroi Baqaei, duke iu referuar personazhit Dory, peshkut me kujtesë të dobët nga filmi i animuar “Në kërkim të Nemos”.

Diplomati iranian theksoi se akuzat ndaj Irakut u përdorën për të krijuar mbështetje publike për pushtimin e vitit 2003, pasojat e të cilit, sipas tij, ishin katastrofike jo vetëm për popullin irakian, por edhe për rajonin dhe vetë shoqërinë amerikane.

“Tani e gjejmë veten përballë akuzave të reja ogurzeza”, tha ai, duke shtuar se narrativa aktuale duket se po ndjek të njëjtin skenar.

Reagimi i Teheranit erdhi pasi presidenti amerikan Donald Trump deklaroi të mërkurën në një intervistë për Fox News se ekzistojnë indikacione që Irani mund të jetë duke punuar për zhvillimin e armëve biologjike ose kimike, pas dëmeve të shkaktuara në programin e tij bërthamor

Home Kryefaqja
Shiko në: YouTube
Lajme të Sugjeruara

GTA 6 thyen rekordet që në ditën e parë, 2.36 miliardë dollarë të ardhura dhe 24.5 milionë kopje të shitura

Grand Theft Auto 6 (GTA 6) ka shënuar një sukses të jashtëzakonshëm që në ditën e lançimit, duke gjeneruar rreth 2.36 miliardë dollarë të ardhura...
08:15 | 20/11/2026

Hungaria pritet të heqë veton për negociatat e anëtarësimit të Ukrainës në BE

Hungaria pritet të heqë veton për hapjen e dy grupeve të fundit të negociatave të anëtarësimit të Ukrainës në Bashkimin Evropian. Vendimi pritet të formalizohet...
08:11 | 20/11/2026

Publikohen pamjet e shembjes së ndërtesës në Brooklyn, tetë viktima mes tyre dy fëmijë (VIDEO)

Një video e re, e publikuar nga Autoriteti i Transportit Metropolitan të Nju Jorkut (MTA), ka dokumentuar momentin tragjik kur një ndërtesë trekatëshe në Brooklyn...
08:02 | 20/11/2026