Prokuroria e Vlorës ka konfiskuar pasuri të paluajtshme me vlerë rreth 16 milionë euro në zonën e “Ujit të Ftohtë”, të cilat dyshohet se janë përfituar përmes dokumenteve të falsifikuara. Pasuritë, sipas njoftimit zyrtar, i përkisnin shtetasit me inicialet P.P., i cili është dënuar me 7 vite burg për falsifikim dokumentesh dhe pastrim të produkteve të veprës penale.
Hetimet kanë përfshirë një sipërfaqe prej 32 mijë metrash katrorë, ku rezultoi se gjatë procedurave gjyqësore dhe administrative për njohjen dhe kthimin e pronës ishte përdorur një vendim gjyqësor i falsifikuar. Dokumentet e paraqitura në këto procedura, përfshirë vendimin e falsifikuar, shërbyen për të legjitimuar regjistrimin e pronës në vitin 2009.
Pas regjistrimit të pronës, janë kryer veprime për ndarjen dhe tjetërsimin e saj në emër të personave të tretë. Këto veprime u kryen me qëllim, siç njoftohet, të fshehjes së origjinës së paligjshme të pasurisë. Nga hetimet ka rezultuar gjithashtu se pasuritë fillestare u shfrytëzuan për t’u përvetësuar më tej dhe për t’u kaluar në emra të ndryshëm, duke krijuar një zinxhir transaksionesh që mbulonte origjinën e tyre.
Me kërkesë të Prokurorisë së Vlorës, gjykata vendosi konfiskimin e pronës fillestare dhe të disa pasurive të tjera që rrjedhin prej saj. Pas vendimit të gjykatës, këto pasuri kalojnë në pronësi të shtetit. Konfiskimi përfshin si prona të paluajtshme në zonën e “Ujit të Ftohtë”, ashtu edhe pasuri të tjera që lidhen me këto tjetërsime.
Njoftimi zyrtar thekson se veprimet e ndërmarra nga organet kanë synuar zbardhjen e mënyrës së përfitimit të këtyre pasurive dhe rivendosjen e tyre në pronësi të shtetit, në përputhje me vendimin e gjykatës dhe kërkesën e Prokurorisë së Vlorës.

