Gjykata e Durrësit ka shpallur moskompetencën për çështjen e ish-drejtoreshës së Postës Shqiptare, Elisabeta Mataj, duke ia kaluar dosjen Gjykatës së Posaçme (GJKKO). Pas këtij vendimi ka reaguar avokati i familjes Mataj, i cili njoftoi se do t’i drejtohen SPAK-ut për të mësuar ecurinë e hetimit.
Avokati deklaroi se gjatë seancës kishte kërkuar zëvendësimin e masës së arrestit në shtëpi me një masë më të lehtë, por e cilësoi zhvillimin e saj pa praninë e prokurorit si shkelje të ligjit. Ai kundërshtoi edhe vendimin e gjykatës për shpalljen e moskompetencës, duke pretenduar se për këtë duhej të ishte i pranishëm prokurori.
“Ne do të shkojmë në SPAK dhe do të shohim zhvillimet se ku është procedimi në këtë fazë”, deklaroi avokati.
Në reagimin e tij, ai ngriti akuza të rënda për përmasat e abuzimit me fondet e Postës Shqiptare, duke pretenduar se vlera e vjedhjes ka kaluar 3.6 miliardë lekë dhe se skema ka funksionuar prej vitesh, me përfshirjen e disa personave dhe mbështetje politike.
Avokati i bëri thirrje Kontrollit të Lartë të Shtetit (KLSH) të thellojë verifikimet për fondet e tërmetit, të cilat, sipas tij, kanë kaluar përmes Postës Shqiptare. Ai kërkoi që revizionimi kontabël të shtrihet deri në periudhën kur në institucion u instalua sistemi Eterna.
Sipas avokatit, Prokuroria e Durrësit nuk ka hetuar në mënyrë të plotë personat që, sipas tij, drejtonin skemën e abuzimit, ndërsa Elisabeta Mataj është përfshirë padrejtësisht në këtë çështje.
Ai kundërshtoi gjithashtu arrestimin e bashkëshortit të ish-drejtoreshës, duke pretenduar se masa është marrë pa prova dhe përbën shpërdorim detyre nga ana e prokurorisë dhe Gjykatës së Durrësit.a.b



