Autoriteti Rrugor Shqiptar ka hapur dy tenderë për zgjerimin e autostradës Tiranë–Durrës, duke e çuar projektin drejt Vorës. Fondi limit për të dyja procedurat arrin në 4.82 mld lekë, nga të cilat 2.32 mld lekë janë për fazën e katërt dhe rreth 2.5 mld lekë për fazën e pestë.
Në total të dy fazat e reja të zgjerimit shtrihen në rreth 6 km, nga zona e Limuthit deri në Gërdec. Sipas grafikëve të tenderëve, punimet për secilën fazë janë planifikuar të zgjasin 24 muaj, nga nënshkrimi i kontratës.
Në fazën e katërt, krahas zgjerimit të rrugës kryesore, dokumentet parashikojnë punime në nënkalimin e këmbësorëve në Picar, dy mbikalime për këmbësorët dhe një rrugë dytësore. Në fazën e pestë përfshihen nyja në disnivel e Vorës, nënkalimet e Vorës dhe Gërdecit, si dhe ndërhyrje në rrugët dytësore.
Dy tenderët pasojnë punimet që kanë nisur në lotin III që shkon deri te nënkalimi i Limuthit. Për fazat III, IV e V, projektbuxheti i vitit 2027 parashikon së bashku 2.56 mld lekë financim gjatë vitit.
Ndërkaq, zgjerimi pritet të vijojë edhe me pesë faza të tjera, nga e gjashta deri te e dhjeta, me një vlerë të planifikuar prej 16.2 mld lekësh. Sipas projektbuxhetit, fondet e para për këto faza parashikohen në vitin 2028 dhe financimi shtrihet deri në vitin 2031.
Segmenti i parë i zgjeruar, prej rreth 6 km nga Tirana deri te mbikalimi i Rinasit, është hapur plotësisht për qarkullimin që prej prillit të vitit 2026. Ai ka 8 korsi në total, nga 4 për secilin drejtim, duke u kategorizuar si rrugë e kategorisë A.
Paralelisht me tenderët për zgjerimin e autostradës Tiranë–Durrës, Autoriteti Rrugor Shqiptar ka hapur edhe tri procedura për rikonstruksionin e rrugës së vjetër Kombinat–Ndroq–Plepa, si një aks alternativ me autostradën. Tenderët për lotet 4, 5 dhe 6 kanë një fond limit të përbashkët prej rreth 3.57 mld lekësh.










