Rajoni

Përplasje për Kosovën në Parlamentin serb, Bakić i kujton Vuçiçit premtimin për Gazivodën

Seanca konstituive e Parlamentit të Serbisë u shoqërua të enjten me një përplasje të ashpër mes Jovo Bakićit, drejtuesit të grupit parlamentar të Listës Studentore, dhe ish-presidentit Aleksandar Vuçiç.

Në qendër të debatit ishin Milan Radoiçiç dhe sulmi i armatosur në Banjskë të Kosovës.

Bakić kujtoi se Radoiçiçit i ishte lejuar të qëndronte në galerinë e Parlamentit, ndërsa, sipas tij, studentëve u ishte ndaluar prania në atë hapësirë. Ai kundërshtoi deklaratat e mëparshme të Vuçiçit, i cili kishte thënë se Radoiçiç mbronte serbët në Kosovë. Bakić e cilësoi ndërhyrjen e Policisë së Kosovës në veri si pushtim nga forcat shqiptare.

Gjatë fjalës së tij, Bakić rikujtoi edhe deklaratat e mëparshme të Vuçiçit se nuk do të lejonte që Gazivoda t’i kalonte Kosovës, duke e sfiduar atë me pyetjen se çfarë kishte ndodhur me këtë premtim.

“Nuk e jap Gazivodën! Nuk e jap Gazivodën! Le të më vrasin, Gazivodën nuk e jap! Çfarë ndodhi me Gazivodën? Çfarë ndodhi?”, deklaroi Bakić, duke imituar ish-presidentin serb.

Vuçiç, tashmë në opozitë, iu përgjigj duke e quajtur Bakićin gënjeshtar. Sa i përket pranisë së Radoiçiçit në Parlament, ai deklaroi se në atë kohë ishte ftuar në cilësinë e nënkryetarit të Listës Serbe, gjatë një seance të posaçme kushtuar Kosovës.

Përplasja mes tyre u zhvillua përpara votimit për drejtimin e Parlamentit. Pas tri ditësh diskutimesh, deputetët zgjodhën Aleksandar Čupićin e Listës Studentore në postin e kryetarit të Parlamentit, me 140 vota.

Me marrjen e kësaj detyre, Čupić mori edhe kompetencat e ushtruesit të detyrës së presidentit të Serbisë, pas dorëheqjes së Vuçiçit nga posti i kreut të shtetit në shtator.

 

 

JavaScript is required for tabnav widget to work properly.