Agjencia e Administrimit të Pasurive të Sekuestruara dhe të Konfiskuara (AAPSK) ka mbështetur 20 projekte gjatë vitit 2026, duke orientuar financimet dhe ripërdorimin social të pasurive drejt parandalimit të kriminalitetit, rehabilitimit të viktimave, riintegrimit social dhe fuqizimit të grupeve vulnerabël.
Sipas të dhënave, evidentohen 1,035 përfitues dhe profesionistë të trajnuar, ndërsa edhe pasuri të paluajtshme janë përdorur për qëllime sociale.
Projektet janë realizuar përmes bashkëpunimit me organizata të shoqërisë civile, duke synuar që pasuritë e sekuestruara dhe të konfiskuara nga veprimtaria kriminale të shndërrohen në instrumente konkrete në shërbim të komunitetit.
Mbështetja është përqendruar veçanërisht te fëmijët dhe të rinjtë, viktimat e trafikimit, personat në proces rehabilitimi, familjarët e punonjësve të Policisë së Shtetit të rënë në detyrë, si dhe kategoritë e tjera në nevojë.
Sipas raportimit të AAPSK-së, 728 fëmijë dhe të rinj janë përfshirë në programe edukimi, ndërgjegjësimi, zhvillimi dhe parandalimi të kriminalitetit.
Një tjetër kategori e rëndësishme janë personat në proces rehabilitimi dhe riintegrimi social. Në këtë grup raportohen 217 persona të mbështetur përmes programeve dhe shërbimeve të dedikuara.
Ndërkohë, 136 viktima të trafikimit janë përfshirë në programe mbështetëse, rehabilitimi dhe riintegrimi, ndërsa 82 viktima të krimit kanë përfituar nga shërbime dhe aktivitete të ndryshme.
Mbështetja ka përfshirë gjithashtu familjarë të punonjësve të Policisë së Shtetit të rënë në detyrë, persona me aftësi të kufizuara dhe ndërhyrje sociale në komunitete vulnerabël.
Paralelisht, 75 profesionistë janë trajnuar për të përmirësuar kapacitetet në ofrimin e shërbimeve dhe mbështetjen e kategorive në nevojë.
Nga rehabilitimi te punësimi, rezultatet e projekteve
Përtej numrit të përfituesve, raportimi evidenton edhe rezultatet konkrete të programeve të mbështetura.
Në total, 325 persona kanë marrë shërbime të drejtpërdrejta, ndërsa 185 persona janë përfshirë në programe rehabilitimi dhe riintegrimi social.
Një tjetër tregues lidhet me aftësimin dhe përgatitjen për tregun e punës. Sipas të dhënave, 98 persona janë përfshirë në programe formimi profesional dhe arsimimi, ndërsa nëntë persona kanë marrë mbështetje drejt punësimit.
20 projekte, nga mbrojtja e viktimave te parandalimi i kriminalitetit
Projektet e mbështetura fokusohen në mbrojtjen, rehabilitimin dhe riintegrimin social e ekonomik të viktimave të trafikimit, veçanërisht grave, vajzave dhe fëmijëve, përmes strehimit, asistencës psikologjike e ligjore, arsimimit dhe mbështetjes për punësim.
Një tjetër drejtim i rëndësishëm është rehabilitimi i të miturve dhe të rinjve në konflikt me ligjin, përgatitja e tyre për rikthimin në shoqëri dhe parandalimi i përsëritjes së veprave penale. Mbështetja shtrihet edhe te parandalimi i kriminalitetit përmes edukimit, artit, ndërgjegjësimit, përfshirjes sociale dhe rehabilitimit të personave me histori varësie nga substancat.
Projekte të veçanta synojnë mbrojtjen dhe fuqizimin e viktimave të dhunës, si dhe mbështetjen ekonomike të familjarëve të punonjësve të Policisë së Shtetit të rënë në detyrë. Në tërësi, këto nisma synojnë kthimin e pasurive të përfituara nga veprimtaritë kriminale në burime mbështetëse për komunitetin, duke nxitur ripërdorimin social, integrimin dhe krijimin e mundësive të reja ekonomike.
Pasuri të paluajtshme në funksion të komunitetit
Një nga elementet më të rëndësishme të veprimtarisë së AAPSK-së është ripërdorimi social i pasurive të sekuestruara dhe të konfiskuara.
Gjatë vitit 2026, në kuadër të projekteve të raportuara, dy pasuri të paluajtshme janë përdorur për qëllime sociale.
Ky mekanizëm synon që asetet e lidhura me veprimtarinë kriminale të mos mbeten vetëm objekt administrimi shtetëror, por të krijojnë vlerë të drejtpërdrejtë për komunitetin, veçanërisht për kategoritë që kanë nevojë për mbështetje dhe rehabilitim.
Në këtë mënyrë, ripërdorimi social shërben edhe si një instrument për të rikthyer në shërbim të shoqërisë pasuri që më parë kanë qenë të lidhura me veprimtari të paligjshme.
Projektet e mbështetura kanë pasur shtrirje në qarqet Tiranë, Elbasan dhe Vlorë, duke përfshirë bashkitë Tiranë, Kamëz, Elbasan, Vlorë, Selenicë dhe Sarandë, si dhe iniciativa me shtrirje kombëtare./TCH
Top Channel