Rënie me gati 10% e aksioneve të Anthropic, zhduken fitimet pas debutimit historik në Nasdaq

20/11/2026 18:18

Vetëm një ditë pas hyrjes rekord në bursë, kompania e inteligjencës artificiale përballet me presion të fortë nga investitorët.

Aksionet e kompanisë amerikane të inteligjencës artificiale Anthropic pësuan një rënie prej gati 10% të premten, vetëm një ditë pas debutimit historik në bursën Nasdaq. Rënia fshiu fitimet e konsiderueshme të regjistruara gjatë ditës së parë të tregtimit dhe riktheu shqetësimet mbi qëndrueshmërinë e investimeve në sektorin e inteligjencës artificiale.

Sipas të dhënave të raportuara, aksioni ra me 9,6%, duke zbritur në 87,90 dollarë. Megjithatë, çmimi mbeti lehtësisht mbi nivelin prej 83 dollarësh, që ishte përcaktuar për ofertën fillestare publike (IPO).

Gjatë seancës së parë të tregtimit, të enjten, aksionet e Anthropic kishin shënuar një rritje deri në 34%, duke arritur në 111,50 dollarë. Në pikun e kësaj rritjeje, vlera e kompanisë në treg përllogaritej përkohësisht në rreth 2 trilionë dollarë.

Megjithatë, entuziazmi fillestar nuk zgjati shumë. Aksionet e mbyllën seancën e parë në nivelin 97,17 dollarë, përpara se të përballeshin me presionin e shitjeve një ditë më vonë.

Shqetësime për sektorin e inteligjencës artificiale

Rënia e Anthropic vjen në një moment kur edhe pjesa tjetër e tregut teknologjik po përballet me presione. Indeksi Nasdaq regjistroi humbje mbi 1% gjatë së premtes, ndërsa në territor negativ u pozicionua edhe S&P 500.

Investitorët po tregohen gjithnjë e më të kujdesshëm ndaj aksioneve të kompanive të teknologjisë dhe veçanërisht atyre që lidhen me inteligjencën artificiale.

Në të kundërt, obligacionet shtetërore amerikane fituan terren, ndërsa interesat e tyre ranë, duke reflektuar kërkesën për investime që konsiderohen më të sigurta. Yield-i i obligacioneve amerikane 10-vjeçare zbriti nën nivelin 5%.

Sipas analistit të Jefferies, Jeffrey Favuzza, pamundësia e Anthropic për të ruajtur nivelin e çmimit të arritur në debutimin e saj, së bashku me presionet e shitjes në tregtimin paraprak të së premtes, përbën një sinjal negativ edhe për pjesën tjetër të sektorit teknologjik.

Ecuria e aksioneve të Anthropic në ditët në vijim pritet të jetë një tregues i rëndësishëm për mënyrën se si tregjet do të vlerësojnë kompanitë e inteligjencës artificiale pas debutimeve me vlerësime rekord.

Top Channel