“Arrestoni Ramën!”, marshim nate në Tiranë, qytetarët u bien borive në mbështetje të protestuesve: Më 28 Nëntor pritet protestë masive

Shkruar nga: Y Pepa | Publikuar më: 20.11.2026, 20:49

Protestat kundër qeverisë vijojnë në Tiranë, ndërsa qytetarët kanë marshuar edhe gjatë natës në rrugët e kryeqytetit, duke valëvitur flamujt kuqezi dhe duke kërkuar arrestimin e kryeministrit Edi Rama.

“Arrestoni Ramën!”, brohorasin demonstruesit, ndërsa turma lëviz mes automjeteve të ndaluara në trafik. Thirrjet shoqërohen me duartrokitje dhe fishkëllima, ndërsa drejtuesit e mjeteve u bien vazhdimisht borive në shenjë mbështetjeje për protestuesit. Nga pamjet duket se marshimi ka tërhequr vëmendjen edhe të qytetarëve që ndodheshin në rrugë.

Mes turmës shfaqet edhe një banderolë me mbishkrimin “Policë Dhunues”, ku fjala “Policë” është kryqëzuar me të kuqe. Mesazhi i drejtohet Policisë së Shtetit dhe lidhet me akuzat e protestuesve për dhunë dhe ndërhyrje të tepruar gjatë tubimeve të mëparshme.

Ndërkohë, vëmendja është përqendruar te protesta e paralajmëruar për 28 Nëntor, në Ditën e Pavarësisë. Organizatorët kanë bërë thirrje për një mobilizim të gjerë në Tiranë, me pjesëmarrjen e qytetarëve nga qytete të ndryshme të vendit dhe shqiptarëve të diasporës. Kërkesa kryesore është largimi i Edi Ramës nga posti i kryeministrit dhe mbajtja e përgjegjësisë për qeverisjen.

Pakënaqësia që po shoqëron këtë mobilizim lidhet me akuzat për korrupsion, mungesën e llogaridhënies dhe mënyrën se si institucionet kanë trajtuar protestat e fundit. Në këtë lëvizje janë përfshirë edhe kërkesa të studentëve për përmirësimin e kushteve në universitete, uljen e kostove të arsimit dhe më shumë mundësi për të rinjtë.

Kështu, 28 Nëntori pritet të jetë një tjetër ditë e rëndësishme për protestën kundër qeverisë Rama. Në një datë me simbolikë të veçantë kombëtare, qytetarët pritet të dalin në rrugë me flamujt kuqezi, duke kërkuar ndryshim dhe përgjegjësi politike.

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
JOQ Sondazh
KLIKO PËR TË VOTUAR
Më të Lexuarat
Shkarkoni aplikacionin JOQ ALBANIA në platformat
Më të fundit