Presidenti amerikan Donald Trump ka shprehur mbështetjen për Jensen Huang, drejtuesin e kompanisë Nvidia, duke vlerësuar kontributin e tij në industrinë e çipave të inteligjencës artificiale dhe në ruajtjen e avantazhit teknologjik të SHBA-së.
Gjatë një konference për shtyp në Shtëpinë e Bardhë, Trump tha se Huang mund të ketë marrë disa vendime të gabuara, por kjo nuk e zbeh vlerësimin e tij për të.
“Ai mori disa vendime të këqija, por është një person i shkëlqyer”, deklaroi presidenti amerikan, duke theksuar rëndësinë e Nvidia-s për konkurrueshmërinë e SHBA-së në sektorin e teknologjisë.
“Do të doja shumë ta shihja përsëri. E dini, ne jemi një vend me shanse të dyta dhe do të doja shumë ta shihja. Kjo është një kompani shumë e rëndësishme për ne dhe ai na vendosi në një pozicion ku jemi fjalë për fjalë 10 vjet përpara kompanive të tjera”, u shpreh Trump.
Presidenti amerikan solli në vëmendje edhe mbështetjen që i kishte dhënë Elon Musk gjatë mandatit të tij të parë, duke argumentuar se sipërmarrësit dhe drejtuesit e suksesshëm duhet të mbrohen.
“E dini, unë e mbrojta Elonin shumë fuqishëm gjatë mandatit tim të parë. Nuk jam i sigurt nëse Eloni do të ishte me ne tani nëse unë nuk do të isha. Dhe thashë, ne duhet të mbrojmë njerëzit tanë të shkëlqyer, sepse asnjë vend nuk ka shumë prej tyre”, deklaroi ai.
Trump e cilësoi Nvidia-n si një kompani me rëndësi strategjike për SHBA-në, në një kohë kur gara globale për zhvillimin e inteligjencës artificiale dhe teknologjisë së avancuar të çipave është intensifikuar.

