Një grup studentësh shqiptarë kanë shpallur krijimin e Lëvizjes Studentore Kombëtare, një organizim të pavarur që synon të përfaqësojë shqetësimet e të rinjve dhe të kërkojë ndryshime në sistemin politik, arsim, punësim dhe funksionimin e institucioneve.
Përmes një deklarate publike, studentët theksojnë se iniciativa është vazhdimësi e protestave qytetare, të nisura më 31 maj 2026, të cilat, sipas tyre, morën një tjetër dimension më 13 tetor me përfshirjen e gjimnazistëve dhe studentëve.
Lëvizja kërkon transparencë dhe hetim të pavarur për pretendimet mbi përdorimin e forcës së tepruar nga policia gjatë protestave, duke theksuar rëndësinë e respektimit të së drejtës për tubime paqësore.
Një ndër shqetësimet kryesore të studentëve është emigrimi i të rinjve. Ata kërkojnë krijimin e kushteve që brezi i ri të ketë mundësi të arsimohet, të punësohet dhe të ndërtojë të ardhmen në Shqipëri, pa qenë i detyruar të largohet jashtë vendit.
Studentët nënvizojnë se ndryshimet e vërteta nuk lidhen vetëm me zëvendësimin e individëve në pushtet, por me reforma që garantojnë zgjedhje të ndershme, institucione funksionale dhe llogaridhënie.
Sipas deklaratës, organizimi nuk ka kryetar dhe synon përfshirjen e gjerë të studentëve në diskutime dhe vendimmarrje, duke mbrojtur pluralizmin dhe debatin e hapur.
Lëvizja paralajmëron se do të prezantojë propozime konkrete për reforma politike dhe institucionale, të përgatitura në bashkëpunim me qytetarë, pedagogë, intelektualë dhe profesionistë të fushave të ndryshme.
Në përfundim, studentët bëjnë thirrje për bashkim dhe pjesëmarrje aktive në jetën publike, duke theksuar se qëllimi i tyre është ndërtimi i një Shqipërie më të drejtë, ku të rinjtë të kenë mundësi reale zhvillimi.
Ata shprehen të vendosur të vijojnë angazhimin qytetar përmes nismave konkrete dhe protestave paqësore, duke kërkuar që zëri i rinisë të dëgjohet dhe të merret seriozisht nga institucionet përgjegjëse.