Roma shkatërron Parmën 5-1, Donyell Malen i frikshëm me katër gola
Roma ka dhuruar spektakël në kampionatin italian, duke triumfuar me rezultatin 5-1 në transfertën ndaj Parmës, në ndeshjen e vlefshme për javën e 12-të të Serie A.
Protagonisti absolut i kësaj përballjeje ishte Donyell Malen, i cili zhvilloi një paraqitje të jashtëzakonshme, duke realizuar katër gola dhe duke udhëhequr skuadrën e drejtuar nga Gian Piero Gasperini drejt një fitoreje bindëse.
Sulmuesi holandez zhbllokoi rezultatin në minutën e 39-të, duke kaluar verdhekuqtë në avantazh përpara pushimit.
Parma reagoi në fillimin e pjesës së dytë, me Nesta Elphege që barazoi shifrat në minutën e 54-t. Megjithatë, festa e vendasve zgjati pak, pasi Malen riktheu avantazhin e Romës në minutën e 68-të.
Vetëm tri minuta më vonë, Rodrigo Mora realizoi golin e tretë për miqtë, duke i dhënë Romës një avantazh të rëndësishëm.
Në minutën e 77-të, holandezi shënoi golin e tretë personal, ndërsa në minutën e 90-të vulosi pokerin e tij dhe rezultatin përfundimtar 5-1.
Një paraqitje e jashtëzakonshme për sulmuesin e Romës, i cili ishte i pandalshëm në fushë dhe i dha skuadrës së tij tri pikë me shumë vlerë.
Me këtë sukses, Roma shkon në kuotën e 30 pikëve dhe ngjitet përkohësisht në vendin e dytë të renditjes, vetëm dy pikë larg Lazios kryesuese, në pritje të ndeshjes së Interit.
Një fitore që konfirmon ambiciet e Romës për të qenë protagoniste në garën për titullin kampion, ndërsa Malen po shndërrohet në një nga emrat më të rëndësishëm të skuadrës së Gasperinit.




