Estonia mbyll 5 pikat kufitare me Rusinë nga 1 dhjetori, radhë të gjata në kufi

Estonia mbyll 5 pikat kufitare me Rusinë nga 1 dhjetori, radhë të gjata në kufi

19:54, 21/11/2026
ZMADHO TEKSTIN
+ Aa -

Estonia do të pezullojë nga 1 dhjetori të gjitha kalimet në pesë pikat kufitare rrugore me Rusinë, përfshirë lëvizjen e këmbësorëve dhe automjeteve. Vendimi, i cili do të jetë në fuqi për të paktën gjashtë muaj, ka nxitur radhë udhëtarësh në zonat kufitare, ndërsa familje dhe qytetarë po përpiqen të kalojnë përpara mbylljes.

Në qytetin rus të Ivangorodit, përballë qytetit estonez Narva, dhjetëra persona janë fotografuar duke pritur në radhë me valixhe, çanta shpine dhe qese në duar. Për shumë prej tyre, kufiri nuk është thjesht një pikë kalimi, por lidhja me familjarët që jetojnë në anën tjetër të lumit Narva.

Një qytetare e intervistuar nga AFP, e identifikuar vetëm me emrin Angela, tha se vendimi do ta pengojë të takojë vëllain e saj që jeton në Rusi. Edhe banorë të tjerë e kanë cilësuar mbylljen si një goditje për jetën e përditshme dhe lidhjet familjare.

Qeveria estoneze e miratoi zyrtarisht vendimin më 20 nëntor. Ai përfshin pesë pikat Narva-1, Narva-2, Koidula, Luhamaa dhe Saatse. Pas gjashtë muajsh, autoritetet do të rivlerësojnë situatën e sigurisë dhe do të vendosin nëse kufizimi do të vazhdojë apo do të ndryshohet.

Masa prek kalimin e njerëzve dhe automjeteve në rrugë, ndërsa transporti hekurudhor i mallrave do të vijojë sipas kufizimeve ekzistuese dhe nën kontrolle të rrepta doganore. Qeveria u ka kërkuar qytetarëve estonezë që ndodhen në Rusi të planifikojnë kthimin në vend përpara datës 1 dhjetor.

Në qendër të tensioneve të fundit është tentativa për sabotim ndaj kompanisë Threod Systems, prodhuese e dronëve dhe sistemeve të vëzhgimit, në Viimsi, pranë Talinit.

Sipas Prokurorisë së Përgjithshme të Estonisë, ngjarja ndodhi në orën 03:06 të mëngjesit të 14 nëntorit. Të dyshuarit tentuan të hynin në ambientet e kompanisë, të thyenin xhamat dhe të hidhnin lëndë të ndezshme brenda ndërtesës, me synimin për të shkaktuar zjarr dhe shpërthim.

Ndërhyrja e ekipit të sigurisë së kompanisë bëri të mundur parandalimin e sulmit. Nuk pati të lënduar dhe aktiviteti i prodhimit dhe furnizimit të kompanisë nuk u ndërpre.

Tetë shtetas letonezë u ndaluan në territorin estonez në kuadër të operacionit. Prokurorja e Përgjithshme Astrid Asi bëri të ditur se prokuroria kishte kërkuar nga gjykata arrestimin e pesë prej të dyshuarve. Hetimet synojnë të përcaktojnë organizatorët, rolin e secilit person dhe lidhjet e mundshme me individë të tjerë.

Shërbimi i Sigurisë së Shtetit të Letonisë konfirmoi se kishte bashkëpunuar me autoritetet estoneze në parandalimin e sulmit. Sipas këtij institucioni, më 14 nëntor u kryen kontrolle në nëntë adresa në Letoni, ku u sekuestruan pajisje shpërthyese, materiale piroteknike, municione, telefona dhe pajisje për ruajtjen e të dhënave.

Autoritetet estoneze ia atribuojnë organizimin e sulmit shërbimit rus të inteligjencës ushtarake, GRU. Kreu i Shërbimit të Sigurisë së Brendshme të Estonisë, Margo Palloson, deklaroi se hetimet e kundërzbulimit kishin konfirmuar përfshirjen e inteligjencës ruse.

Ky nuk është incidenti i parë i këtij lloji gjatë vitit. Në gusht, një zjarr në ambientet e kompanisë së mbrojtjes Milrem Robotics në Talin u cilësua nga kundërzbulimi estonez si akt sabotimi i porositur nga shërbimet ruse. Edhe në atë rast u arrestuan disa shtetas letonezë.

Kryeministri estonez Kristen Michal tha se vendimi nuk lidhet vetëm me një incident të veçantë, por me një seri aktivitetesh armiqësore që, sipas autoriteteve, kanë vijuar kundër Estonisë dhe vendeve të tjera evropiane.

Qeveria argumenton se pezullimi i kalimeve rrugore do të vështirësojë rekrutimin dhe ndikimin e personave nga shërbimet ruse të inteligjencës, si dhe do të ndihmojë në parandalimin e shmangies së sanksioneve dhe aktiviteteve të tjera të paligjshme ndërkufitare.

Sipas transmetuesit publik estonez ERR, numri i kalimeve në kufirin mes dy vendeve ka rënë ndjeshëm: nga më shumë se katër milionë në vit përpara vitit 2022, në rreth 760 mijë gjatë vitit 2026. Prej tyre, 447 mijë kalime janë regjistruar në urën që lidh Narvën me Ivangorodin.

Rusia ka kundërshtuar akuzat për organizimin e sabotimit dhe ka kritikuar vendimin e Talinit. Zëdhënësi i Kremlinit, Dmitry Peskov, tha më 16 nëntor se Estonia po ndërton një mur, duke paralajmëruar se masa mund të ketë pasoja për vetë vendin.

Ndërsa zëdhënësja e Ministrisë së Jashtme ruse, Maria Zakharova, deklaroi më 20 nëntor se mbyllja cenon të drejtat dhe interesat e një numri të konsiderueshëm qytetarësh rusë. Ajo paralajmëroi se Moska rezervon të drejtën të marrë masa politike dhe diplomatike për mbrojtjen e interesave të saj.

Mbyllja e kufirit estonez vjen në një kohë kur edhe Finlanda e ka mbajtur të mbyllur kufirin tokësor me Rusinë që prej dhjetorit 2023, ndërsa Letonia, Lituania dhe Polonia kanë vendosur kufizime të forta në pikat e tyre kufitare lindore.

© SYRI.net

Lexo edhe:

Denonco