Kryesia e Kuvendit dhe tri komisione parlamentare mblidhen nesër
Në rendin e propozuar të seancës së ardhshme është edhe buxheti i komisionit hetimor për rastin e vrasjes së Arlinda Zekajt.
Kryesia e Kuvendit të Kosovës do të mblidhet nesër (e hëne), më 23 nëntor, në orën 11:00, për të diskutuar rendin e ditës të seancës së ardhshme plenare. Në Kuvend janë paralajmëruar edhe mbledhjet e tri komisioneve parlamentare.
Në rendin e propozuar për seancën plenare është miratimi i buxhetit të komisionit parlamentar që heton veprimet dhe mosveprimet e institucioneve lidhur me vrasjen e Arlinda Zekajt dhe trajtimin e dhunës ndaj grave dhe fëmijëve në familje. Në propozim përfshihen edhe deklarimet jashtë rendit të ditës dhe pyetjet parlamentare.
Komisioni për Integrim Evropian do të takohet në orën 09:45 me ambasadorin e Bashkimit Evropian në Kosovë, Dick Schuebel. Në orën 10:30, Komisioni për Mirëqenie Sociale, Punë dhe Familje do të takohet me komisionin qeveritar përgjegjës për njohjen dhe verifikimin e statusit të të mbijetuarve të dhunës seksuale gjatë luftës. Diskutimi do të përqendrohet te çështjet që lidhen me marrjen e këtij statusi.
Sipas kalendarit të Kuvendit, Komisioni për Punë të Jashtme dhe Diasporë do të mblidhet në orën 12:00.















