Një ngjarje e rëndë kriminale në familje është parandaluar nga Policia në Libohovë, ku një 40-vjeçar ka kërcënuar bashkëshorten se do ta vriste me armë zjarri automatike dhe ka qëlluar në ajër pas një konflikti për motive të dobëta.
Policia ka arrestuar në flagrancë shtetasin me inicialet T. B., banues në Libohovë dhe me precedent të mëparshëm penal, pas rreth dy orësh e 30 minutash negociatash.
Sipas njoftimit zyrtar, pas konfliktit me bashkëshorten, 40-vjeçari e ka kërcënuar me armë dhe më pas është larguar me automjet, duke qëlluar në ajër.
Shërbimet e Komisariatit të Policisë Gjirokastër, Stacionit të Policisë Dropull-Libohovë dhe Forcës së Posaçme “Shqiponja” organizuan operacionin policor “Reagimi”, duke bërë të mundur neutralizimin dhe arrestimin e tij.
Gjatë ndërhyrjes, policia sekuestroi armën automatike, e cila kishte fishekë në folenë e fishekut, si dhe krehërin me municionin përkatës.
Materialet procedurale i janë referuar Prokurorisë për veprime të mëtejshme.a.b





