Rreth 400 gramë kokainë janë sekuestruar në dy banesa në Gramsh, gjatë një operacioni të zhvilluar nga Agjencia e Mbikëqyrjes Policore (AMP), në bashkëpunim me Prokurorinë e Elbasanit. Ndryshe nga informacioni fillestar për 500 gramë, raportimet e publikuara deri tani flasin për rreth 400 gramë lëndë narkotike.
Kontrollet janë ushtruar në banesat e dy personave me inicialet T. H. dhe R. H., të cilët ndodheshin nën masën e sigurisë “arrest në shtëpi”. Sipas të dhënave paraprake, ata dyshohet se vijonin aktivitetin e shpërndarjes së lëndëve narkotike, pavarësisht masës së vendosur ndaj tyre.
Hetimet janë shtrirë edhe ndaj efektivëve të policisë zonale, të dyshuar për shpërdorim detyre, pasi dyshohet se nuk kanë kryer kontrollet e nevojshme për të verifikuar nëse dy personat respektonin masën e arrestit në shtëpi. Njëri prej tyre raportohet se ishte përfshirë edhe më parë në shpërndarjen e lëndëve narkotike.
Operacioni vijon, ndërsa autoritetet nuk kanë bërë ende publike identitetet e personave të përfshirë dhe detaje të tjera mbi hetimin. m.k



