Ministri i Arsimit i Koresë së Jugut, Choi Kyo-jin, ka dhënë dorëheqjen pas një skandali që lidhet me përdorimin e inteligjencës artificiale për të kopjuar në provime. Ngjarja ka ngritur shqetësime serioze mbi sigurinë dhe integritetin e sistemit të pranimit në universitetet e vendit. Skandali shpërtheu më 15 nëntor, kur kandidati që kishte marrë rezultatin më të lartë në provimin e kontabilitetit tatimor pranoi se kishte përdorur një aparat fotografik dhe një telefon inteligjent për të marrë ndihmën e inteligjencës artificiale gjatë testimit. Falë kësaj metode, ai kishte arritur të siguronte një rezultat pothuajse perfekt. Zbulimi erdhi vetëm katër ditë përpara provimit kombëtar Suneung, një prej testeve më të rëndësishme dhe më konkurruese në vend, ku marrin pjesë rreth gjysmë milioni maturantë që synojnë të pranohen në universitet. Përballë shqetësimeve për raste të tjera të mundshme kopjimi, autoritetet morën masa të jashtëzakonshme sigurie. Mes tyre ishte ndërprerja e rrjeteve Wi-Fi pranë qendrave të provimit, si dhe ofrimi i një shpërblimi prej 68 mijë eurosh për personat që raportonin shkelje të rregullave. Megjithatë, reagimi i ministrit të Arsimit shkaktoi një valë kritikash në opinionin publik. Gjatë një seance me ligjvënësit të hënën, Choi Kyo-jin u pyet nëse autoritetet do të mund të identifikonin kandidatët që përdornin pajisje elektronike për të kopjuar gjatë provimit universitar. Politikani 72-vjeçar u përgjigj se, për shkak të moshës, nuk ishte i sigurt nëse do të ishte në gjendje ta bënte këtë. Deklarata u prit me reagime të ashpra, ndërsa ministri nuk u shfaq në konferencat për shtyp gjatë ditëve në vijim. Pas kritikave të shumta, ministri njoftoi vendimin për t'u larguar nga detyra.