Një stuhi e fuqishme ka goditur qytetin Tupancireta, në jug të Brazilit, duke shkaktuar pesë viktima dhe 265 të plagosur. Fenomeni ekstrem meteorologjik la pas dëme të mëdha materiale, ndërsa mijëra banesa u shkatërruan ose u dëmtuan rëndë. Stuhia përfshiu zonën rurale, ku jetojnë rreth 20 mijë banorë, në shtetin Rio Grande do Sul. Sipas autoriteteve, erërat arritën shpejtësinë deri në 114 kilometra në orë. Bilanci i dëmeve është tepër i rëndë. Nga 8,600 banesat që ndodhen në qytet, rreth 8 mijë u prekën nga stuhia. Brenda më pak se një ore, erërat e forta shkulën çatitë e ndërtesave, shembën mure, rrëzuan pemë dhe shtylla elektrike, duke lënë zona të tëra pa energji elektrike dhe ujë të pijshëm. Pothuajse të gjithë banorët u detyruan të largoheshin nga banesat e tyre për shkak të rrezikut. Sipas Mbrojtjes Civile të Rio Grande do Sul, rreth 40 persona u sistemuan në strehimore të përkohshme publike. Qeveria federale shpalli gjendjen e katastrofës për rajonin, duke u dhënë mundësi ministrive të mobilizojnë burime financiare dhe logjistike për të ndihmuar familjet e prekura.