Vendosni fjalën kyçe....

Spanjollët përkujtojnë vdekjen e Frankos (Video)


Mbështetës të diktatorit spanjoll Francisco Franco marshuan të premten në mbrëmje në Madrid, ndërsa disa prej tyre kryen përshëndetje naziste gjatë përkujtimeve që shënonin 51-vjetorin e vdekjes së tij dhe 90-vjetorin e ekzekutimit të José Antonio Primo de Rivera-s, themeluesit të lëvizjes fashiste spanjolle Falange.

Demonstrata u organizua nga organizata e ekstremit të djathtë Falange Española de las JONS, e cila publikoi disa video të marshimit me sloganin: “Nuk do të ndalemi derisa ta kemi ripushtuar Spanjën”.

Marshimi nisi në rrugën Genova, ku ndodhet selia e Partisë Popullore konservatore (PP), dhe vijoi drejt rrugës Ferraz, ku ndodhet selia e Partisë Socialiste të Punëtorëve në pushtet (PSOE).

Në një tjetër video, demonstruesit këndojnë himnin e Falange-s, “Cara al Sol”, përpara selisë së PSOE-së. “Ne kemi kaluar dhe do të kalojmë sërish”, deklaruan organizatorët.

Përkujtimet u zhvilluan më pak se dy javë pasi policia arrestoi 14 persona, të dyshuar si anëtarë të një organizate tjetër neonaziste, Nucleo Nacional, e cila ka lidhje të dokumentuara me Falange Española de las JONS. Anëtarë të të dy grupeve kanë marrë pjesë në demonstrata të përbashkëta, përfshirë një protestë përpara Ambasadës së Marokut në Madrid, në muajin korrik.

Sipas një hetimi të gazetës El País, militantë të Nucleo Nacional udhëtuan në Ukrainë në muajin gusht, ku vendosën kontakte me njësinë e njohur neonaziste Azov, e cila tashmë është pjesë e Gardës Kombëtare të Ukrainës.

Sipas raportimeve, militantët spanjollë u stërvitën me pushkë automatike AK-47 për të fituar aftësi luftarake, të cilat mund t’ua përcjellin rekrutëve në përgatitje për një kryengritje të armatosur në Spanjë. Hetimi zbuloi gjithashtu fotografi të militantëve duke pozuar me armë dhe duke shfaqur simbole naziste gjatë qëndrimit në Ukrainë.

Më herët të premten, mbështetës të Frankos u mblodhën në varrezat Mingorrubio në Madrid, ku ish-diktatori u rivarros në vitin 2019, pasi eshtrat e tij u hoqën nga mauzoleumi në Luginën e të Rënëve.

Fotografitë nga tubimi tregojnë pjesëmarrësit duke ngritur krahun e djathtë në përshëndetje naziste, pranë varrit të diktatorit, të mbuluar me lule.

Të enjten në mbrëmje, më shumë se 100 mbështetës të Frankos morën pjesë në një meshë përkujtimore në famullinë e Dymbëdhjetë Apostujve në Madrid.

Franco sundoi Spanjën nga përfundimi i Luftës Civile Spanjolle, në vitin 1939, deri në vdekjen e tij, në vitin 1975. Gjatë diktaturës së tij, kundërshtarët politikë u burgosën dhe u torturuan. Sipas një studimi të historianit spanjoll Julian Casanova, në dekadën pas Luftës Civile u dokumentuan më shumë se 35.000 ekzekutime të kryera në 33 provinca të Spanjës.

Numri i dokumentuar nuk përfshinte disa provinca, përfshirë Madridin, për shkak të mungesës së të dhënave të disponueshme. Casanova vlerësoi se gjatë asaj periudhe u ekzekutuan të paktën 50.000 persona, shkruan Rt.