Këtë të premte mbahet protesta e 97-të, dhe aktivistja Arvina Lleshi foli për ndalimin e protestuesve nga policia, duke treguar edhe përvojën e saj personale, pasi ishte mes personave të arrestuar. Lleshi deklaroi se ishte duke protestuar në mënyrë paqësore kur, sipas saj, është dhënë urdhër për arrestimin e saj. Ajo tha se ndalime të tilla nuk do ta pengojnë të vijojë pjesëmarrjen në protesta.
”Po e hap fjalën time me thirrjen që bëra më parë. Unë u arrestova me urdhër të shefit të krimit, Ervin Hasrama. Po protestoja paqësisht kur erdhi dhe dha urdhër: ‘Kapeni këtë vajzën dhe arrestojeni’. Nëse mendoni se mund të na intimidoni me forma të tilla presioni, po ua them publikisht se nuk ia dilni dot”, u shpreh ajo.
Aktivistja theksoi se do të vijojë të marrë pjesë në protesta për sa kohë ato zhvillohen në mënyrë paqësore. ”Unë do të dal çdo ditë në protestë, për sa kohë ajo është paqësore. Kemi qenë duke protestuar paqësisht dhe nuk kemi bërë asgjë të keqe”, deklaroi Lleshi. Ajo komentoi marrëdhënien mes protestuesve dhe forcave të policisë, duke argumentuar se thirrjet e protestuesve nuk duhet të konsiderohen si fyerje ndaj efektivëve.
