Shqipëria është gati për anëtarësimin në BE. Kështu shprehet ministri i Europës dhe i Punëve të Jashtme, Ferit Hoxha pas takimit me komisioneren për zgjerimin Marta Kos në Dublin. Sipas kreut të diplomacisë shqiptare Kos do të çojë përpara këtë proces për të cilin Shqipëria është e përqëndruar për të vazhduar me reformat dhe angazhimet, si edhe për të ruajtur ritmin e negociatave të anëtarësimit në BE.
Postimi i plotë nga Hoxha
Kënaqësi të takohem dhe të bisedoj me Komisioneren e BE-së për Zgjerimin, Marta Kos, në margjinat e Këshillit të Çështjeve të Përgjithshme, që zhvillohet gjatë këtyre dy ditëve në Dublin.
Nuk do të humbasim kurrë asnjë shans për të qenë të pranishëm kudo që flitet për zgjerimin, për të paraqitur modelin e Shqipërisë; dhe kudo që zgjerimi është në agjendë, Marta Kos është aty për ta çuar procesin përpara.
Shkëmbyem mendime mbi dinamikën aktuale të procesit të anëtarësimit, perspektivat e tij dhe, mbi të gjitha, rëndësinë e ruajtjes së ritmit dhe momentumit të negociatave.
Për Shqipërinë, objektivi mbetet i qartë: të ecim përpara me vendosmëri dhe të mbyllim sa më shumë kapituj negociues të jetë e mundur këtë vit, duke vazhduar të zbatojmë reformat dhe angazhimet. Ne mbetemi plotësisht të përqendruar në punën përpara dhe të vendosur për të ruajtur ritmin e negociatave.
Zgjerimi ka të bëjë me meritën, momentumin dhe rezultatin.
Shqipëria është gati për të treja.