Aktivistja Sidorela Vatnikaj u ka bërë thirrje qytetarëve që të mblidhen nesër në orën 10:00 para Gjykatës Penale, në mbështetje të 14 protestuesve të arrestuar, të cilët pritet të dalin para gjykatës për seancën e masës së sigurisë. Vatnikaj u ka kërkuar qytetarëve të jenë të pranishëm pranë gjykatës, e cila ndodhet pranë SPAK-ut, duke e cilësuar pjesëmarrjen si një akt solidariteti me protestuesit e ndaluar.
“Intimidimi i tyre nuk na frikëson, por na bashkon dhe na forcon qëndresën. Na bën të vijmë sërish këtu për t’ju thënë: arrestoni Ramën”, u shpreh Vatnikaj. Ajo deklaroi gjithashtu se qytetarët, sipas saj, ndodhen përballë dy alternativave: bashkimit ose pranimit të një klase politike që e cilësoi si të korruptuar dhe të kriminalizuar.
“Ky shesh e ka marrë vendimin e vet. Përballë Ramës dhe Besës apo pasqyrës së tij, ne kemi zgjedhur njëri-tjetrin dhe kërkojmë dorëheqjen e menjëhershme të tij dhe kabinetit të Ramës”, tha aktivistja. Në përfundim, Vatnikaj përsëriti thirrjen për qytetarët që t’u bashkohen protestuesve nesër, në orën 10:00, përpara Gjykatës Penale.
