Lionel Messi pritet të marrë një nga homazhet më të veçanta në historinë e futbollit argjentinas. Pas njoftimit për tërheqjen e tij nga kombëtarja, Federata Argjentinase e Futbollit (AFA) ka vendosur të organizojë një ceremoni simbolike në nder të kapitenit dhe ikonës së “Albicelestes”.
Në të gjitha kampionatet kombëtare të Argjentinës, si në futbollin e meshkujve dhe femrave, ashtu edhe në futsal dhe futbollin e plazhit, ndeshjet do të ndërpriten në minutën e 10-të të pjesës së parë. Për 60 sekonda, lojtarët dhe tifozët do të ftohen të nderojnë Messin me duartrokitje, kore, flamuj dhe mënyra të tjera simbolike.
Zgjedhja e minutës së 10-të nuk është aspak rastësore. Numri 10 ka qenë simboli i Messit me fanellën e Argjentinës për pjesën më të madhe të karrierës së tij. Ai e mori këtë numër në vitin 2009, pas largimit nga kombëtarja të Juan Román Riquelmes.
Përpara ndeshjeve, në stadiumet që kanë ekrane gjigante do të transmetohet gjithashtu një video speciale kushtuar karrierës së yllit argjentinas.
Messi largohet nga kombëtarja pas një kapitulli të jashtëzakonshëm. Me fanellën e Argjentinës, ai ka regjistruar 207 paraqitje dhe 125 gola, ndërsa momenti kulmor ishte triumfi në Kupën e Botës 2022 në Katar.