Kryetari i Partisë Demokratike, Sali Berisha zhvilloi një takim me Osman Osmanin dhe studiuesin Elez Osmani, të cilët i cilësoi si përfaqësues të njohur të diasporës shqiptare. Në një postim në rrjetet sociale, Berisha bëri të ditur se gjatë takimit u diskutua për zhvillimet politike në Shqipëri dhe Kosovë, si dhe për rolin e diasporës shqiptare në jetën politike dhe kombëtare. “Vlerësuam rolin e pazëvendësueshëm e pozitiv të diasporës në këto zhvillime”, shkruan Berisha, duke e përshkruar takimin si të hapur dhe të ngrohtë.
Postimi i plotë
Takim me zotërinjtë Osman Osmani dhe Elez Osmani, përfaqësues të njohur të diasporës tonë.
Në këtë takim diskutuam për zhvillimet politike në Shqipëri e në Kosovë dhe vlerësuam rolin e pazëvendësueshëm e pozitiv të diasporës në këto zhvillime.
Studiuesi i njohur Elez Osmani më dhuroi një kopje të monografisë së tij kushtuar jetës dhe veprimtarisë së personalitetit të shquar të çështjes kombëtare, Vasil Germenji, politikan, avokat i çështjes shqiptare, nip i Themistokli Germenjit, gazetar, poet satirik, publicist i shquar, nënkryetar i Federatës Ndërkombëtare të Gazetarëve të Lirë, Kryetar i Asamblesë së Kombeve të Robëruara të Evropës dhe anëtar i Komitetit “Shqipëria e Lirë”.
Takimi ishte i hapur dhe i ngrohtë.