Festivali i Filmit në Venecia ka marrë vendimin e pazakontë për të anuluar konferencën tradicionale për shtyp me jurinë, e cila zakonisht zhvillohet përpara nisjes së garës zyrtare të filmave, e planifikuar të mërkurën.
Vëzhguesit e industrisë së filmit kanë spekuluar se vendimi mund të jetë marrë për të shmangur pyetjet e ndjeshme politike, të cilat janë bërë pjesë e konferencave për shtyp në festivalet e mëdha të filmit.
Organizatorët e edicionit të 83-të të festivalit e kanë mohuar këtë pretendim dhe thanë për revistën e industrisë së filmit “Deadline”, se konferenca ishte anuluar për shkak të një “përplasjeje në agjendë”.
Konferenca, në fillim të festivalit me anëtarët e jurisë, që vlerësojnë filmat në garë është një praktikë e zakonshme në festivale të mëdha si Venecia, Kana dhe Berlini.
Në Festivalin Ndërkombëtar të Filmit në Berlin, në shkurt, konferenca për shtyp u kthye në një pikënisje të një debati të ashpër politik për luftën e Izraelit në Gaza.
Debati vazhdoi gjatë gjithë festivalit dhe u shoqërua me një letër të hapur, protesta dhe deklarata publike.
Kryetari i jurisë, regjisori Wim Wenders, u pyet për luftën dhe tha se kineastët duhet “të qëndrojnë jashtë politikës” dhe të shërbejnë si një lloj “kundërpeshe njerëzore” ndaj saj.
Deklaratat shkaktuan reagime të forta dhe më pas kineastët u pyetën vazhdimisht për qëndrimin e tyre ndaj luftës.
Çështja e Gazës ishte e pranishme edhe në Festivalin e Filmit në Venecia vitin e kaluar, veçanërisht për shkak të filmit “The Voice of Hind Rajab”, që tregon historinë e një vajze palestineze të vrarë në Gaza.
Regjisorja e filmit, Kaouther Ben Hania, fitoi çmimin e dytë më të rëndësishëm të festivalit dhe këtë vit është pjesë e jurisë, e cila drejtohet nga aktorja dhe regjisorja amerikane Maggie Gyllenhaal.
Edhe kryetari i jurisë së vitit të kaluar, Alexander Payne, u pyet për konfliktin në Gaza gjatë konferencës në Venecia në vitin 2025.
Lufta në Gaza do të jetë sërish pjesë e garës këtë vit, me filmin “Naza”, me regji të Yuval Abraham dhe Rachel Szor, që konkurron për çmimet kryesore të festivalit.
Abraham dhe Szor ishin pjesë e ekipit prej katër regjisorësh të filmit “No Other Land”, i cili fitoi çmimin “Oscar” për dokumentarin më të mirë në vitin 2025.