Ministria e Mbrojtjes bën me dije se gjatë 24 orëve të fundit në vend janë regjistruar 32 vatra zjarri. Nga këto, 11 vijojnë të jenë aktive, 5 janë nën monitorim, ndërsa 16 janë shuar plotësisht.
Për menaxhimin e situatës është angazhuar një numër i konsiderueshëm forcash dhe mjetesh në të gjithë vendin. Në terren kanë qenë 735 forca vendore dhe 64 automjete zjarrfikëse. Në mbështetje të operacioneve, Forcat e Armatosura kanë angazhuar 475 efektivë, 7 automjete zjarrfikëse, 4 helikopterë dhe një avion “Air Tractor”. Ndërkohë, për ditën e sotme janë planifikuar 160 efektivë ushtarakë në zonat ku zjarret vijojnë të paraqesin problematika.
Fokusi kryesor i ndërhyrjes është përqendruar në vatrat më të vështira.
Në Malin e Dajtit, përveç strukturave të bashkisë, janë angazhuar 77 efektivë të Forcave të Armatosura dhe një helikopter.
Në zonën e Bardhajve në Shkodër po operojnë 5 automjete zjarrfikëse, shërbimi pyjor dhe strukturat e emergjencave civile. Në ndihmë të tyre janë vendosur edhe një automjet zjarrfikës dhe një helikopter i FA-së. Gjatë ditës së sotme pritet t’i bashkohen operacionit edhe 33 forca dhe një ambulancë.
Në qarkun e Fierit janë angazhuar 13 automjete zjarrfikëse, 4 autobote, 55 efektivë dhe 90 forca të tjera. Mbështetja nga Forcat e Armatosura përfshin 90 ushtarakë, një helikopter dhe një avion “Air Tractor”, ndërsa sot operacioni do të vijojë me 33 forca shtesë.
Ndërkohë, në Himarë operacioni është mbyllur pas shuarjes së zjarrit. Për përballimin e situatës u mobilizuan 26 automjete zjarrfikëse, 120 efektivë, 40 vullnetarë, 67 forca bashkiake, 20 punonjës policie dhe 180 efektivë të Forcave të Armatosura, të mbështetur nga dy helikopterë.
Agjencia Kombëtare e Mbrojtjes Civile vijon monitorimin e situatës në të gjithë territorin e vendit, në bashkëpunim me prefekturat, bashkitë dhe strukturat e tjera të Mbrojtjes Civile.
Forcat dhe mjetet operacionale mbeten në gatishmëri dhe në terren për të ndërhyrë në çdo zonë ku paraqitet nevoja, me prioritet mbrojtjen e jetës së qytetarëve, banesave, pronës dhe mjedisit.