Një operacion i gjerë kundër shpërndarjes së lëndëve narkotike dhe armëmbajtjes pa leje është finalizuar pas dy muajsh hetime nga Policia, në bashkëpunim me Prokurorinë.
Operacioni, i koduar “Vjeshta”, ka çuar në kapjen dhe ndalimin e 20 personave, ndaj të cilëve Gjykata e Sarandës kishte caktuar masën e sigurisë “arrest në burg”.
Gjatë kontrolleve të zhvilluara në kuadër të hetimit, uniformat blu sekuestruan dy armë zjarri pistoletë, si dhe sasi kokaine dhe kanabisi të ndara në dhjetëra doza, që dyshohet se ishin për qëllime shitjeje. Gjithashtu, si prova materiale u sekuestruan katër automjete, 19 telefona celularë dhe një shumë parash në lekë dhe euro.
Hetimi është zhvilluar nga Komisariati i Policisë Sarandë, në bashkëpunim me Prokurorinë dhe struktura të tjera të Policisë së Shtetit. Në operacion morën pjesë edhe Forca e Posaçme Operacionale, Forca Kombëtare e Sigurisë, njësitë e Fierit dhe Tiranës, si dhe strukturat vendore të Policisë në Tiranë, Elbasan dhe Gjirokastër.
Sipas autoriteteve, personat e ndaluar dyshohet se ishin të përfshirë në shitjen dhe shpërndarjen e lëndëve narkotike në zonën e Sarandës. Aktiviteti dyshohet se zhvillohej kryesisht në zonat e plazheve, lokalet e natës dhe pranë institucioneve arsimore.
Gjatë kontrolleve, dy prej të ndaluarve u gjetën me nga një pistoletë. Armët janë sekuestruar dhe do t’i nënshtrohen ekzaminimeve të mëtejshme nga Instituti i Policisë Shkencore.
Në kuadër të të njëjtit procedim penal, më 31 korrik 2026 ishin arrestuar në flagrancë edhe tre persona, ndërsa policia kishte sekuestruar 5 kilogramë kanabis, që dyshohet se do të shpërndahej në Sarandë dhe Ksamil.
Gjatë aksionit është proceduar në gjendje të lirë edhe një 36-vjeçar nga Lushnja, pasi dyshohet se kundërshtoi efektivët e Policisë për të penguar kontrollin në një dhomë hoteli, ku u gjet një nga personat e arrestuar me armë.
Hetimet vijojnë nën drejtimin e Prokurorisë së Sarandës për dokumentimin e plotë të aktivitetit kriminal, përcaktimin e përgjegjësive individuale dhe identifikimin e personave të tjerë që mund të jenë të përfshirë.