Udhëtarët që planifikojnë të hyjnë në Bashkimin Evropian mund të përballen me pritje më të gjata në pikat kufitare, pasi më 6 shtator përfundon periudha e fleksibilitetit për zbatimin e Sistemit të Hyrje-Daljeve (EES).
Megjithëse afati ka përfunduar, disa shtete anëtare ende nuk janë gati të zbatojnë plotësisht kontrollet biometrike për shkak të problemeve teknike dhe mungesës së infrastrukturës së nevojshme.
Sistemi EES parashikon regjistrimin elektronik të shtetasve nga vendet jashtë Bashkimit Evropian, përmes fotografimit dhe marrjes së gjurmëve të gishtërinjve në momentin e kalimit të kufirit.
Komisioni Evropian nuk pranoi kërkesat e industrisë së aviacionit dhe turizmit për të zgjatur periudhën e zbatimit gradual deri në fund të vitit, duke lënë në fuqi afatin e përcaktuar.
Kompanitë ajrore dhe operatorët e udhëtimeve paralajmërojnë se zbatimi i plotë i sistemit mund të sjellë vonesa të konsiderueshme në aeroporte dhe pika të tjera kufitare. Gjatë fazës së parë të implementimit janë regjistruar radhë të gjata në disa aeroporte evropiane, ndërsa disa pasagjerë kanë humbur edhe fluturimet.
Sipas përfaqësuesve të sektorit, përmirësimi i situatës gjatë muajve të fundit ka ardhur kryesisht falë zbatimit më fleksibël të rregullave dhe jo sepse problemet teknike janë eliminuar plotësisht.
Ndërkohë, udhëtarët nga Mbretëria e Bashkuar drejt Francës nuk pritet të ndiejnë ndryshime të menjëhershme, pasi pajisjet biometrike në pika si Eurotunnel, Porti i Doverit dhe terminali Eurostar në St Pancras ende nuk funksionojnë plotësisht. Në disa raste, regjistrimi në sistem vijon të kryhet manualisht nga punonjësit e kontrollit kufitar.
Komisioni Evropian ka bërë të ditur se po bashkëpunon me shtetet anëtare për të zgjidhur problematikat teknike dhe për të mbështetur fazën e tranzicionit, por deri më tani nuk ka njoftuar një shtyrje të afatit të fleksibilitetit. Si pasojë, udhëtarët nga vendet jashtë BE-së duhet të llogarisin më shumë kohë për procedurat kufitare, veçanërisht në pikat më të ngarkuara të hyrjes në Evropë.
