Pavarësisht zërave nga Premier League, Galatasaray mbetet destinacioni më i mundshëm për Rafael Leao. Klubi turk pritet të paraqesë në orët e ardhshme një ofertë të përmirësuar për sulmuesin portugez, e cila këtë herë mund ta bindë seriozisht Milanin. Propozimi i ri pritet të arrijë në 50 milionë euro, shifra që kërkohet nga drejtuesit e klubit kuqezi për të dhënë dritën jeshile për largimin e Leao.
Galatasaray ka përgatitur një formulë të ndarë në disa pjesë. Klubi turk do t’i ofrojë Milanit 35 milionë euro të garantuara, ndërsa marrëveshja do të përfshijë edhe 5 milionë euro bonuse të lehta, të lidhura me kualifikimin e Galatasarayt mes 24 skuadrave të para në fazën e ligës së Champions League.
10 milionë eurot e tjera do të jenë bonuse më të vështira për t’u arritur dhe do të aktivizohen nëse Galatasaray arrin deri në çerekfinalet e Champions League. Kështu, operacioni mund të arrijë në total 50 milionë euro, edhe pse shuma përfundimtare nuk është e garantuar. Një tjetër element i rëndësishëm është dëshira e vetë lojtarit. Leao kishte refuzuar më herët mundësinë e transferimit te Al Hilal, pasi dëshiron të vazhdojë të luajë në Europë.
Në këtë situatë, Galatasaray duket se është opsioni që e tërheq më shumë portugezin, sidomos për shkak të një oferte të majme personale. Klubi turk i ka propozuar një pagë prej rreth 12 milionë eurosh në sezon. Ndërkohë, Aston Villa vijon të jetë e interesuar për Leao, por nuk duket e gatshme të afrohet me shifrat e kërkuara nga Milani. Edhe emri i Tottenhamit është përmendur, por deri tani nuk ka zhvillime konkrete.
Koha po ngushtohet: merkatoja në Itali mbyllet më herët, ndërsa në Turqi afati përfundon më 3 shtator. Tashmë vendimi është në duart e Milanit, i cili duhet të vlerësojë nëse oferta e Galatasarayt është e mjaftueshme për të lënë të lirë një prej yjeve kryesorë të skuadrës.