Një grup prej më shumë se 10 personash, disa prej tyre të armatosur, dyshohet se kanë shkuar në një resort në zonën e Orikumit, ku kanë kërcënuar pronarin dhe i kanë kërkuar 5 milionë euro.
Ngjarja ka ndodhur rreth orës 11:30. Sipas informacioneve paraprake, mes palëve ka pasur edhe një konflikt fizik, ndërsa më pas personat janë larguar nga resorti.
Pronari ka njoftuar Policinë, e cila ka ngritur menjëherë pika kontrolli. Në afërsi të Pusit të Mezinit, efektivët kanë konstatuar një automjet që lëvizte me shpejtësi dhe janë vënë në ndjekje të tij.
Drejtuesi humbi kontrollin dhe automjeti u aksidentua. Brenda tij u gjetën tre persona. Dy prej tyre kanë mbetur të dëmtuar, ndërsa personi i tretë nuk ka probleme shëndetësore.
Gjatë kontrollit të automjetit, policia ka gjetur një armë zjarri, pistoletë.
Një grup i posaçëm hetimor, nën drejtimin e Prokurorisë, po punon për zbardhjen e plotë të dinamikës së ngjarjes dhe identifikimin e personave të tjerë të përfshirë.
Shërbimet e Policisë së Vlorës, në bashkëpunim me struktura të tjera, po vijojnë kontrollet për identifikimin dhe kapjen e personave të tjerë që dyshohet se kanë marrë pjesë në ngjarje.a.b
