Mali i Zi është tronditur nga një ngjarje e rëndë kriminale në Danilovgrad, ku tre persona janë vrarë me armë zjarri në një poligon qitjeje ndërsa qeveria malazeze ka shpallur 1 dhe 2 shtatorin ditë zie kombëtare.
Ngjarja ka ndodhur të hënën, pak pas orës 16:00, në poligonin e qitjes “Češka Zbrojevka”, pranë Danilovgradit. Sipas autoriteteve dhe mediave malazeze, tre viktimat ishin punonjës të poligonit.
Viktimat janë identifikuar si Petar Globarević, 24 vjeç, nga Podgorica, Momir Radonjić, 67 vjeç, nga Danilovgradi, dhe Nemanja Kapor, 20 vjeç, nga Podgorica.
Policia malazeze ka shpallur në kërkim shtetasin rus Mihail Šabunjin, 30 vjeç, i dyshuar për autorësinë e vrasjes së trefishtë.
Pas ngjarjes, policia dyshon se Šabunjin është larguar nga vendi i krimit me një automjet tip “Seat Cordoba”, ngjyrë e zezë, me targa PG AC 472. Automjeti është në pronësi të babait të njërit prej viktimave.
Mjeti është gjetur më vonë në zonën e Rogamëve, pranë restorantit “Stefan”, ndërsa kërkimet për të dyshuarin vijojnë. Autoritetet kanë paralajmëruar se 30-vjeçari mund të jetë i armatosur.
Policia u ka bërë thirrje qytetarëve të tregohen të kujdesshëm dhe, për sa kohë vijon operacioni, të qëndrojnë në banesat e tyre.
“Ftojmë qytetarët që, nëse kanë të dhëna për personin e dyshuar ose e vërejnë atë, të raportojnë të dhënat për vendndodhjen dhe lëvizjet e tij në Drejtorinë e Policisë”, thuhet në njoftimin e policisë.
Kryeministri i Malit të Zi, Milojko Spajić, ka shprehur ngushëllimet për familjet e viktimave dhe ka deklaruar se është në komunikim të vazhdueshëm me ministrin e Brendshëm dhe drejtuesit e Policisë për hetimet dhe lokalizimin e autorit të dyshuar.
Spajić tha se pret që personi përgjegjës të vihet përpara drejtësisë sa më shpejt.
Në shenjë zie pas ngjarjes, qeveria ka shpallur dy ditë zie kombëtare, 1 dhe 2 shtator, ndërsa në Danilovgrad është shtyrë edhe nisja e vitit të ri shkollor. Mësimi do të nisë të enjten, më 3 shtator.
Ndërkohë, policia vijon operacionin për gjetjen dhe arrestimin e Mihail Šabunjin, ndërsa hetuesit po punojnë për zbardhjen e plotë të rrethanave dhe motivit të vrasjes së trefishtë.a.b
