Policia e Tiranës ka finalizuar operacionin e koduar “Last Escape”, në kuadër të të cilit është arrestuar në flagrancë një 35-vjeçar italian, i dyshuar për vjedhjen e një automjeti.
Në pranga ka rënë shtetasi italian A. E., 35 vjeç, banues në Itali, i cili dyshohet se ka vjedhur një automjet tip “Audi Q5” dhe, gjatë tentativës për t’u larguar pas ndjekjes nga Policia, ka përplasur disa automjete dhe ka goditur një punonjës policie.
Ngjarja ka ndodhur rreth orës 19:00 të datës 29 gusht 2026, në rrugën dytësore Durrës-Tiranë, pranë një subjekti, ku është raportuar vjedhja e automjetit.
Pas marrjes së njoftimit, shërbimet e Komisariatit të Policisë Nr. 6, në bashkëpunim me Komisariatin e Policisë Rrugore Tiranë, organizuan operacionin për kapjen e autorit.
Sipas Policisë, gjatë tentativës për t’u larguar, 35-vjeçari ka përplasur disa automjete të tjera. Më pas, ai ka goditur me automjet një punonjës policie, i cili ka pësuar dëmtime të lehta në krah.
Në momentin e kapjes, automjeti i vjedhur, “Audi Q5”, drejtohej nga 35-vjeçari, i cili, sipas Policisë, ishte edhe pa leje drejtimi.
Automjeti është sekuestruar në cilësinë e provës materiale.
Materialet procedurale i janë referuar Prokurorisë për veprime të mëtejshme.a.b
