Deputeti i Partisë Demokratike, Blendi Himçi, ka denoncuar bllokimin e pagave të gjyqtarëve dhe prokurorëve nga Ministria e Financave, përmes Drejtorisë së Thesarit.
Në një reagim në rrjetet sociale, Himçi e cilëson këtë veprim si një akt të paprecedentë dhe një ndërhyrje të rëndë ndaj funksionimit të shtetit të së drejtës.
Sipas deputetit demokrat, bllokimi i pagave përbën shkelje të vendimeve gjyqësore dhe presion ndaj magjistratëve. Himçi e interpreton këtë veprim si një formë “hakmarrjeje politike” dhe akuzon qeverinë se po vendos pushtetin ekzekutiv mbi ligjin.
“Një turp i paprecedentë. Ministria e Financave, përmes Drejtorisë së Thesarit, ka bllokuar pagat e prokurorëve dhe gjyqtarëve. Një akt i pashembullt, një dhunim i hapur ndaj shtetit të së drejtës”, shkruan Himçi.
Ai e drejton akuzën ndaj kryeministrit Edi Rama, duke deklaruar se kreu i qeverisë “sillet si monark absolut” dhe se nuk njeh ligjin dhe vendimet e gjykatave.
“Kryeministri sillet si monark absolut. Nuk njeh ligj, nuk njeh gjykatë, nuk njeh kufij”, shprehet deputeti i PD-së.
Himçi pretendon se trajtimi i magjistratëve në këtë mënyrë cenon drejtpërdrejt pavarësinë e drejtësisë.
“Të bllokosh pagat e magjistratëve është të bllokosh vetë drejtësinë. Dhe kur drejtësia bllokohet, vendi nuk ka më shtet. Ka vetëm pushtet”, përfundon ai.
