Ergys Agasi është arrestuar në Durrës, në zonën e Plepave, gjatë një operacioni të forcave RENEA, pasi prej muajsh ishte shpallur në kërkim nga drejtësia shqiptare.
Ai u arrestua në shoqërinë e një ish oficeei të policisë, Ulian Shpataraku.
Agasi është një nga personat kryesorë të hetuar në dosjen e tenderëve të Agjencisë Kombëtare të Shoqërisë së Informacionit (AKSHI), ku ndaj tij rëndojnë akuza për korrupsion, konkurrencë të paligjshme, shkelje të barazisë së pjesëmarrësve në tendera, grup të strukturuar kriminal dhe ndikim të paligjshëm në procedurat e prokurimit publik.
Në kuadër të të njëjtit hetim, ai dyshohet edhe për heqje të paligjshme të lirisë/pengmarrje, lidhur me rastin e biznesmenit Gerond Meçe, i cili dyshohet se është marrë peng dhe kërcënuar pas kundërshtimeve të tij ndaj procedurave të tenderëve.
Sipas hetimeve, Agasi dyshohet se ka përdorur lidhjet e tij me drejtues të institucioneve publike për të ndikuar në përcaktimin e fituesve të tenderëve, ndërsa përmes kompanive të lidhura me të dyshohet se janë kryer transaksione me vlera të konsiderueshme.
Pas arrestimit në Durrës, Agasi pritet të dërgohet përpara Gjykatës së Posaçme, ku do të përballet me akuzat e ngritura ndaj tij.m.k
