Arrestimi i biznesmenit Ergys Agasi ka qenë një nga temat kryesore të fjalimeve gjatë protestës së 88-të qytetare përpara Kryeministrisë.
Një prej të rinjve që mori fjalën para protestuesve e cilësoi arrestimin e Agasit si një dëshmi, sipas tij, të rënies së qeverisë dhe të fundit politik të kryeministrit Edi Rama.
“Arrestimi i Agasit tregon se shteti ka rënë. Krahu i djathtë i Ramës është prapa hekurave. Kur arrestohet krahu i djathtë i kryeministrit, kjo tregon se kjo qeveri ka rënë dhe se nuk ka qenë kurrë e popullit, por e bandave, mafias dhe rrethit të tyre të ngushtë”, u shpreh protestuesi.
Ai ngriti gjithashtu pikëpyetje mbi përgjegjësinë e kryeministrit Rama dhe akuzoi kreun e qeverisë për lidhje me Agasin.
“Po tani, Edi Rama, kush do ta shoqërojë eskortën tënd, sepse Gysin e ke brenda? Kush e ka radhën pas Agasit? Çfarë justifikimi do të nxjerrësh tani? Përgjegjësia është vetëm e jotja, sepse je kryehajduti i Shqipërisë dhe ti ke marrë fund!”, deklaroi i riu.
Në fjalën e tij, protestuesi iu drejtua edhe SPAK-ut, duke kërkuar që hetimet ndaj personave të arrestuar të vijojnë dhe masat e sigurisë të mos zbuten.
“Një thirrje i bëj SPAK-ut: vijoni hetimet dhe merrini seriozisht! Të mos bëhet rëndom siç ndodh zakonisht që pas një muaji arrestimi ai të kalojë në detyrim paraqitje apo arrest shtëpie”, tha ai.
Protestuesi u shpreh gjithashtu kundër asaj që e cilësoi si “fasadë” të qeverisë dhe kërkoi rikthimin e politikës në realitetin e qytetarëve.
“Menduan se do ndaleshim, por nuk u ndalëm. Zëri ynë u bë më i fortë. Vera kaloi, por për këtë qeveri, i nxehti sapo ka filluar”, tha ai.
Duke iu referuar mbledhjes së qeverisë në Pogradec, i riu e cilësoi atë si një “teatër kukullash” dhe akuzoi qeverinë se jeton në një realitet paralel me qytetarët.
“Këta sillen sikur e kanë situatën nën kontroll. Do qëndrojmë në këtë shesh, nuk durojmë më përbuzje. Këtë realitet që shqiptarët nuk e përtypin më, nuk e rregulloni me propagandë. Rroftë Shqipëria, rroftë shqiptarët!”, përfundoi ai.
