25-vjeçarja Ana Dyrmishi, e cila pësoi djegie të rënda nga zjarri që përfshiu pak ditë më parë një hotel në Vlorë, ka ndërruar jetë në Turqi.
E reja ishte dërguar në Turqi dy ditë pas ngjarjes, me qëllim marrjen e një trajtimi më të specializuar mjekësor. Fillimisht ajo u transportua në një spital në Shqipëri, por për shkak të gjendjes së rëndë shëndetësore u nis drejt Turqisë.
Pavarësisht përpjekjeve të mjekëve, 25-vjeçarja nuk ka mundur t’u mbijetojë plagëve të shkaktuara nga zjarri.
Ngjarja ndodhi rreth orës 04:05 të mëngjesit të 16 gushtit, në ambientet e brendshme të hotelit “Brooklyn”, në lagjen “10 Korriku”, në Lungomare të Vlorës.
Sipas Policisë së Vlorës, pas këqyrjes së pamjeve të kamerave të sigurisë, zjarri dyshohet se ka qenë aksidental dhe ka nisur nga djegia e një prize elektrike të frigoriferit në ambientet e restorantit.
Flakët u përhapën me shpejtësi në hotel, ndërsa pushuesit ndodheshin në dhomat e tyre. Situata ishte veçanërisht e rrezikshme në katin e dytë, ku disa persona mbetën të bllokuar nga tymi dhe flakët.
Për t’i shpëtuar zjarrit, disa prej pushuesve u detyruan të dilnin nga dritaret dhe të hidheshin nga lartësia, duke pësuar dëmtime.
Vdekja e 25-vjeçares në Turqi e rëndon bilancin e kësaj ngjarjeje, ndërsa vijojnë hetimet për zbardhjen e plotë të rrethanave të zjarrit.m.k
