Është mbyllur protesta e 90-të qytetare kundër qeverisë dhe kryeministrit Edi Rama, pas një tjetër mbrëmjeje me marshim në rrugët e Tiranës, thirrje kundër qeverisë dhe mesazhe për ndryshim politik.
Gjatë marshimit u dëgjuan thirrje si “Ndryshim sistemi! Revolucion!”, “Arrestoni Ramën dhe Ballukun!” dhe “Shqipëri e rinisë, jo e partisë!”
Një pjesë e rëndësishme e protestës ishin edhe pankartat, përmes të cilave protestuesit ironizuan nismat e reja të kryeministrit Rama, “Besa” dhe “Prania Besnike”. Në shesh u shpalos edhe mesazhi: “90 ditë, tre muaj. Një kërkesë: llogaridhënie.”
Protestuesit kërkuan largimin e qeverisë, por edhe të asaj që e cilësojnë si “klasa e vjetër politike”. Sipas tyre, Shqipëria duhet t’u përkasë brezave të rinj dhe jo interesave partiake.
Në shesh u përcollën edhe mesazhe nga qytetarë të ndryshëm. Një prej protestuesve akuzoi Edi Ramën dhe Sali Berishën se kanë ndarë mes tyre aferat dhe kërkoi që drejtësia të veprojë ndaj të dyve.
Një tjetër protestuese e cilësoi sheshin si “tempullin e fjalës së lirë”, duke theksuar se pas 90 ditësh protestash qytetarët duhet të ndërtojnë besimin se mund ta ndryshojnë vendin së bashku.
Një moment i veçantë ishte fjala e një turisti të huaj, i cili tha se prej 10 vitesh viziton Shqipërinë dhe është dashuruar me natyrën dhe mikpritjen e shqiptarëve. Ai tha se vitet e fundit ka parë ndryshime që e kanë shqetësuar, duke përmendur malet që digjen, lumenjtë e ndotur dhe zhvillimin e pabarabartë mes bregdetit dhe zonave malore.
“Unë besoj në revolucion, besoj në Shqipëri dhe besoj në ju!”, u shpreh ai para protestuesve.
Gjatë protestës u lexua edhe mesazhi i një qytetari që pretendon se është larguar nga puna për shkak të pjesëmarrjes në protesta. Mesazhi u lexua në shesh nga aktivisti Arben Kola.
“Nga një punë më larguan dhe kam dy muaj që nuk më kthejnë përgjigje për CV-në që kam dërguar”, thuhej në mesazh.
Sipas qytetarit, situata i ka krijuar vështirësi edhe në gjetjen e një pune të re.
Kola u bëri thirrje punonjësve të administratës që t’i bashkohen protestës.
“Kam një thirrje për administratën. Dilni në shesh sepse nëse jemi të gjithë bashkë nuk kanë çfarë të na bëjnë. Dilni për fëmijët dhe të ardhmen sepse nuk kemi Atdhe të dytë, kemi vetëm Shqipërinë”, tha ai.
Në protestën para Kryeministrisë, një tjetër qytetar kërkoi bashkimin e protestuesve dhe komunikimin mes tyre, duke deklaruar se protesta duhet të vijojë deri në largimin e kryeministrit.
“Bashkohuni dhe të dëgjojmë njëri-tjetrin. Ne do jemi në shesh për rrëzimin e këtij kryeministri. Ky kryeministër nuk ka moral. Po vjen shtatori, një thirrje kombëtare për zhdukjen e këtij kryeministri”, u shpreh ai.
Ai kritikoi gjithashtu drejtuesit dhe strukturat shtetërore, ndërsa u bëri thirrje organizatorëve dhe qytetarëve që të mos qëndrojnë pasivë.
“Çdo lloj titullari i shtetit, ore budallenj policë dhe shefa, këta janë protestues. Thirrjen e kam për organizatorët dhe ata që rrinë në kafe, nuk rrëzohet në kafe”, tha protestuesi.
Me përfundimin e marshimit të sotëm, mbyllet dita e 90-të e protestës qytetare, ndërsa protestuesit kanë paralajmëruar vijimin e lëvizjes edhe në ditën e 91-të.m.k
