Kryetari i Partisë Demokratike, Sali Berisha, ka hedhur akuza lidhur me zjarret e rëna gjatë javëve të fundit në zona të ndryshme të vendit, duke theksuar se pas tyre qëndrojnë interesa për ndërtim.
Deklaratat e tij u bënë gjatë një komunikimi për mediat sociale në përgjigje të pyetjes së një ndjekësi në Facebook, Shkëlzen Mustafa, nëse zjarret mund të jenë të qëllimshme dhe të lidhen me interesa klienteliste për hapjen e hapësirave për investime dhe resorte.
“Në fakt, në tërësi zjarret po i shkakton betoni dhe padyshim që ato kanë vetëm një synim: të hapin troje për beton”, deklaroi Berisha.
Ai përmendi edhe një zjarr të raportuar pranë godinës së televizionit publik, duke e lidhur në mënyrë hipotetike edhe këtë rast me mundësinë e ndërtimeve.
“Nuk e di, a e morët vesh apo jo, por dy-tre net zjarri ra edhe te televizioni shtetëror, duket se edhe aty do ndërtohet ndonjë kullë dhe ajo ndërtesë duhet të zhduket. Barbari”, u shpreh kreu i PD-së.
Berisha e mbylli deklaratën duke përsëritur akuzën se zjarret janë të lidhura me interesat e ndërtimit.
“Nuk ka dyshim se zjarret janë të diktuara nga betoni”, deklaroi ai.
