Mbi 5.2 kilogramë heroinë dhe kokainë janë sekuestruar nga Policia e Tiranës gjatë operacionit të koduar “Drejtimi”, ndërsa në pranga kanë rënë dy persona.
Drejtori i DVP Tiranë, Oliger Torba, bëri të ditur se të arrestuarit janë Mirand Herri, 51 vjeç, banues në Maminas, dhe Luftim Hoxha, 41 vjeç, lindur në Dibër dhe banues në Maminas.
Sipas Torbës, policia kishte siguruar informacion se dy personat do të transportonin një sasi të konsiderueshme droge në zonën e “Treshit”, pranë Nishtulla 3, në drejtim të Durrësit.
Gjatë kontrollit të automjetit “Mercedes-Benz” me të cilin ata udhëtonin, policia gjeti një çantë me shtatë pako me lëndë narkotike.
“4 pako me lëndë narkotike të llojit heroinë, me peshë 2 kilogramë e 123.6 gramë, si dhe 3 pako me lëndë narkotike të dyshuar kokainë, me peshë totale 3 kilogramë e 120.6 gramë”, deklaroi Torba.
Në total, sipas Policisë, u sekuestruan 5 kilogramë e 244.2 gramë heroinë dhe kokainë.
Dy të arrestuarit dyshohet se do ta transportonin lëndën narkotike në drejtim të Durrësit. Hetimet vijojnë në bashkëpunim me Prokurorinë për identifikimin e personave të tjerë të përfshirë.a.b
