Të paktën 18 persona kanë humbur jetën dhe mbi 130 të tjerë janë plagosur nga sulmet e fundit ruse në Ukrainë. Një prej sulmeve më të rënda goditi një qendër tregtare në qytetin Kryvyi Rih, në Ukrainën qendrore.
Guvernatori rajonal Oleksandr Hanzha bëri të ditur se mes të plagosurve janë edhe 22 fëmijë. Nëntë persona, përfshirë dy fëmijë, fillimisht u raportuan të zhdukur, ndërsa ekipet e shpëtimit vijuan punën për kontrollin e rrënojave.
Presidenti ukrainas Volodymyr Zelensky e dënoi sulmin, duke e cilësuar atë “absolutisht cinik dhe të neveritshëm”. Sipas tij, një dron i dytë rus goditi qendrën tregtare rreth 30 minuta pas sulmit të parë, duke synuar edhe shërbimet e emergjencës që kishin mbërritur në vendngjarje.
“Sulme të tilla nuk janë gjë tjetër veçse akte terroriste. Ne patjetër do të përgjigjemi”, deklaroi Zelensky.
Dy viktima të tjera janë raportuar nga sulmet ruse në zona të tjera të Ukrainës. Një person humbi jetën pasi një depo u përfshi nga zjarri në Kiev, pas një alarmi për një raketë balistike, ndërsa një tjetër u vra në një sulm me dron në Zaporizhzhia, në orët e para të së shtunës.
Ndërkohë, autoritetet ukrainase vijojnë operacionet e kërkim-shpëtimit dhe vlerësimin e dëmeve të shkaktuara nga sulmet.r.b
