Situata e zjarreve në Shqipëri vijon të jetë kritike. Aktualisht në të gjithë vendin janë aktive 14 vatra zjarri, ndërsa 5 prej tyre konsiderohen me prioritet të veçantë, për shkak të rrezikut që paraqesin për masivet pyjore dhe zonat e banuara.
Kreu i Emergjencave Civile, Haki Çako, dha detaje mbi situatën dhe operacionet që po zhvillohen në disa qarqe të vendit. Një nga vatrat më problematike vijon të jetë ajo në Malin e Tërbunit në Pukë. Çako tha se dendësia e masivit me pisha po vështirëson ndërhyrjen e drejtpërdrejtë të ekipeve në drejtim të vatrës kryesore. Situata ndërlikohet edhe më tej nga erërat e forta dhe temperaturat e larta, të cilat ndryshojnë vazhdimisht drejtimin e flakëve.
Sipas Çakos, prioriteti i forcave në terren është krijimi i një korridori për të ndalur përhapjen e zjarrit dhe mbrojtja e banesave, duke shmangur çdo rrezik për jetën dhe pronën e banorëve. Një tjetër vatër e rëndësishme është ajo në Bardhaj të Shkodrës, ku forcat operacionale po punojnë prej 2-3 ditësh. Ndërhyrje po vijon edhe në zona të tjera të qarkut, përfshirë Vaun e Dejës dhe Malësinë e Madhe.
Për shkak të përparimit të flakëve në drejtim të fshatrave dhe zonave pyjore, është kërkuar edhe ndërhyrja nga ajri. Një helikopter është angazhuar në operacionet për shuarjen e zjarrit në Lundrë të Matit. Vatra zjarri janë evidentuar edhe në Malin e Dajtit, ku ekipet e ndërhyrjes po punojnë për izolimin e tyre dhe parandalimin e përhapjes.