Kryeministri Edi Rama bëri të ditur sot se sektori i teknologjisë eksporton 222 milionë euro produkte, ose tre herë më shumë sesa vetëm pak kohë më parë.
Kryeministri Rama ishte i pranishëm sot në Forumin e Dytë të Inovacionit, me fokus te Inteligjenca Artificiale dhe zhvillimi i sektorit të teknologjisë në Shqipëri.
Fillimisht kryeministri solli në vëmendje avantazhet që krijon teknologjia e informacionit në zhvillimin ekonomik.
Sipas tij qeveria po përgatit një program kombëtar për inteligjencën artificiale, ku të gjithë do të kenë mundësi të thonë fjalën e tyre.
“Ne jemi të vetëdijshëm se të gjitha temat e diskutimit si në asnjë fushë tjetër janë në një dinamikë të jashtëzakonshme, gjë që nga njëra anë është një bekim i madh për vendet si i yni, sepse bëjmë kapërcim falë teknologjisë dhe nga ana tjetër është një sinjal i vazhdueshëm alarmi. Alarm pasi mund të bëjmë shumë prapa nëse nuk ecim me ritmin e kësaj kohe të re”, tha Rama.
Rama kërkoi që në këtë ndërveprim duhet të mbahen parasysh problemet reale, që do të thotë zgjidhje të bazuara në një njohje të plotë dhe diagnozë sa më të saktë të situatës reale.
“E dyta duhen propozime konkrete të zbatueshme, jo dëshira të përgjithshme dhe e treta gatishmëri për t’u angazhuar të gjithë së bashku”, shtoi Rama duke iu drejtuar sipërmarrësve të pranishëm në këtë forum.
Rama ndau po ashtu disa të dhëna me interes, që sipas tij, tregojnë se në çfarë dinamike të jashtëzakonshme është sektori.
“Sot sektori i teknologjisë eksporton 222 milionë euro produkte, ose tre herë më shumë sesa vetëm pak kohë më parë. Sot në këtë sektor janë aktiv thuajse 30 mijë profesionistë të teknologjisë. Për të qenë të saktë janë 28 500, por është një shifër që ka ndryshuar brenda këtij viti”, shtoi Rama.
Po ashtu, kryeministri theksoi se ka një rritje pagash shumë domethënëse në këtë sektor. Nga ana tjetër, Rama theksoi se në Prodhimin e Përgjithshëm Kombëtar të Shqipërisë, sektori ka një peshë të lexueshme tani prej 2.2%, ndërsa deri dje ishte e papërfillshme. Duhet të jetë më e lartë, pa diskutim, por është një shifër kuptimplotë për potencialin e vendit”, shtoi Rama.
ATSH