Ngërçi me pagat në sistemin e drejtësisë ka sjellë edhe bojkotin e parë nga administrata gjyqësore. Punonjësit dhe sekretarët e Dhomës Civile të Gjykatës së Tiranës kanë bllokuar shërbimet, duke kërkuar sqarime se përse ende nuk u janë kaluar pagat e muajit gusht dhe çfarë do të ndodhë me situatën e tyre.
Administrata ka vënë në dijeni kryetarin e Gjykatës për bojkotin, ndërsa punonjësve u është komunikuar se do të ketë një qëndrim pas mbledhjes së kryetarëve të të gjitha gjykatave, e parashikuar për në orën 15:00 në Gjykatën e Lartë.
Për çështjen e pagave të bllokuara janë mbledhur edhe drejtuesit e prokurorive. Prokurori i Përgjithshëm, Olsian Çela, ka thirrur në takim drejtuesit e prokurorive të rretheve dhe Shoqatën e Prokurorëve të Shqipërisë, ndërsa të ftuar janë edhe anëtarët e KLP-së.
Ngërçi nisi pasi Kuvendi nuk miratoi brenda afatit të 31 korrikut formulën e re për pagat e magjistratëve, siç kishte kërkuar Gjykata Kushtetuese.
Pas kalimit të afatit, KLGJ dhe KLP argumentuan se ishin të detyruara të zbatonin vetë vendimin e Kushtetueses dhe përcaktuan pagën e re referuese në 222 mijë e 425 lekë, nga 156 mijë e 800 lekë që ishte më parë, plus shtesën prej 14 mijë lekësh për nivelin e kualifikimit.
Ministria e Financave nuk ekzekutoi listëpagesat e përllogaritura me rritjen, duke argumentuar se përcaktimi i formulës së pagave është kompetencë e Kuvendit. Ministria kërkoi që listëpagesat të ridërgoheshin sipas metodologjisë së mëparshme.
Si pasojë e këtij ngërçi, pa pagat e muajit gusht kanë mbetur jo vetëm gjyqtarët dhe prokurorët, por edhe punonjësit e administratës së gjykatave dhe prokurorive.
Dy ditë më parë, kryeministri Edi Rama deklaroi se “dera e Thesarit të Shtetit”, ku kanë mbetur të bllokuara pagat e institucioneve të drejtësisë, nuk mund të hapet me forcë.
Ndërsa ministri i Drejtësisë, Toni Gogu, ka paralajmëruar se ngërçi pritet të zgjidhet në Kuvend me nisjen e sesionit të ri parlamentar.
Megjithatë, faturën e këtij ngërçi nuk kanë pse ta paguajnë qytetarët. Sistemi gjyqësor përballet prej vitesh me një stok të madh dosjesh dhe me vonesa të gjata në shqyrtimin e çështjeve. Çdo bllokim i ri i shërbimeve vetëm sa e rëndon më tej situatën dhe shtyn në kohë proceset e qytetarëve që presin drejtësi.
Mosmarrëveshja për pagat është një problem institucional dhe duhet të zgjidhet mes institucioneve përgjegjëse, pa cenuar funksionimin normal të gjykatave dhe pa krijuar kosto të reja për publikun.