Operatori i Shpërndarjes së Energjisë Elektrike (OSHEE Group) synon të zhvillojë një rrjet energjetik më inteligjent, ku digjitalizimi, matësit inteligjentë, automatizimi dhe inteligjenca artificiale do të luajnë rol kyç, deklaroi administratori i përgjithshëm i kompanisë, Mentor Hima.
Hima e prezantoi këtë vizion në konferencën ndërkombëtare “3rd International Conference on Renewable Energies and Smart Technologies – IEEE REST 2026”, zhvilluar në Tiranë ku OSHEE Group ishte një prej mbështetësve të aktivitetit.
Sipas Himës, rrjeti i së ardhmes nuk duhet të jetë vetëm më i madh dhe më i qëndrueshëm, por edhe më inteligjent. Në këtë drejtim, modernizimi i infrastrukturës duhet të shoqërohet me digjitalizimin, smart metering, automatizimin dhe përdorimin e inteligjencës artificiale.
Qëllimi, sipas tij, është kalimi nga një rrjet që reagon ndaj problemeve në një rrjet që është në gjendje t’i parashikojë ato, duke rritur eficiencën dhe besueshmërinë e sistemit energjetik.
Një rol të rëndësishëm në këtë transformim pritet të ketë edhe klienti, i cili, sipas Himës, nuk është më vetëm konsumator, por po bëhet pjesëmarrës aktiv në sistemin energjetik dhe në një treg gjithnjë e më të hapur, fleksibël dhe të integruar me tregun europian.
Hima iu referua edhe ligjit të ri “Për energjinë”, duke theksuar se ai e çon më tej rolin e klientit në raport me shërbimet dhe sjelljen e tij në tregun e liberalizuar të energjisë.
Në fjalën e tij, administratori i OSHEE Group nënvizoi gjithashtu rëndësinë e bashkëpunimit mes universiteteve, industrisë dhe operatorëve të energjisë, publikë dhe privatë.
Sipas tij, kërkimi dhe inovacioni marrin vlerë të plotë kur shndërrohen në projekte dhe zgjidhje konkrete për sistemin energjetik.
“Teknologjia do të formësojë rrjetin e së ardhmes, por janë njerëzit që do ta jetësojnë dhe operojnë atë”, u shpreh Hima.
OSHEE Group vijon investimet në infrastrukturë, teknologji, burime njerëzore dhe partneritete, me synimin për ndërtimin e një sistemi energjetik më modern, më të besueshëm dhe të orientuar drejt nevojave të klientëve dhe integrimit europian.
ATSH