Në protestën e 102-të, dhe një prej protestuesve mori fjalën për të bërë thirrje për pjesëmarrje më të madhe qytetare dhe për angazhim të shqiptarëve brenda dhe jashtë vendit. Protestuesi i cili tha se jeton në Angli dhe është me origjinë nga Hasi, u bëri thirrje shqiptarëve të diasporës dhe qytetarëve brenda vendit që t’i bashkohen protestës, duke e cilësuar situatën si një moment kritik për Shqipërinë.
“Unë jetoj në Angli dhe jam nga Hasi. Ne si diasporë jemi rreth 4 milionë shqiptarë. Të gjithë shqiptarët duhet të vijnë në shesh. Ky është një moment kritik. Ejani në shesh në këtë moment tepër delikat”, u shpreh ai.
Ai tha se largimi nga Shqipëria nuk është zgjidhja, pasi, sipas tij, emigrimi i vazhdueshëm i qytetarëve u lë hapësirë pushtetarëve të bëjnë çfarë të duan me vendin. “Protesta bëhet për fëmijët tanë. Unë jam larguar në Angli bashkë me familjen. Shqiptarët po paguajnë çmimin e babëzisë së pushtetarëve”, deklaroi protestuesi.
Në vijim, ai kërkoi që vendi të drejtohet nga njerëz të shkolluar dhe me përvojë, duke përmendur si model kryeministrin e Kosovës, Albin Kurtin. “Ka njerëz të mirë që janë shkolluar jashtë dhe në Shqipëri. Vendi duhet të drejtohet me metodën e Albin Kurtit. Kosova është shtet tjetër, por Shqipërisë i duhet një Albin Kurti”, tha ai.