Një protestë në mbështetje të ish-drejtuesve të UÇK-së, të cilët ndodhen në Hagë, është zhvilluar në Bronx të New York-ut, ku shqiptarë nga Kosova, Shqipëria dhe trevat e tjera shqiptare u mblodhën për të shprehur solidaritetin e tyre.
Protesta u organizua nga Shoqata e Veteranëve të UÇK-së, Batalioni i Atlantikut dhe shoqata të tjera patriotike e kulturore shqiptare në New York, me pjesëmarrjen e shqiptarëve nga Kosova dhe trevat shqiptare.
Në aktivitet ishte i pranishëm edhe Prefekti i Qarkut të Tiranës, Shkëlqim Hajdari, i cili përcolli përshëndetjet e Tiranës për shqiptarët e mbledhur në Bronx.
Në fjalën e tij, Hajdari tha se shqiptarët kanë vijuar të kërkojnë drejtësi për ish-drejtuesit e UÇK-së përmes protestave të zhvilluara në Prishtinë, Hagë, Tiranë, Shkup, qytete të ndryshme të Evropës dhe në diasporë.
Ai solli në vëmendje edhe protestën e zhvilluar më 17 tetor 2025 në Tiranë, ku mijëra shqiptarë u mblodhën në mbështetje të Hashim Thaçit, Kadri Veselit, Jakup Krasniqit dhe Rexhep Selimit.
“Mesazhi është i njëjtë: drejtësi për çlirimtarët”, u shpreh Hajdari.
Duke folur për luftën e UÇK-së, ai tha se ajo lindi nga dhimbja e popullit të Kosovës dhe luftoi për lirinë dhe mbrojtjen e tij.
“UÇK-ja lindi nga dhimbja e një populli dhe luftoi për mbrojtjen e ekzistencës dhe lirinë e tij. Nuk luftoi në tokën e askujt tjetër. Luftoi në tokën e vet, për popullin e vet dhe për të drejtën e tij për të jetuar i lirë”, tha Hajdari.
Ai theksoi se shqiptarët nuk kërkojnë mëshirë apo privilegje, por drejtësi.
“Kërkojmë drejtësi!”, deklaroi ai, duke shprehur besimin te drejtësia ndërkombëtare, Shtetet e Bashkuara të Amerikës dhe mbështetja që, sipas tij, SHBA-ja i ka dhënë Kosovës gjatë periudhave më të vështira.
Hajdari kujtoi gjithashtu rolin e Shteteve të Bashkuara gjatë luftës në Kosovë dhe vlerësoi miqësinë mes shqiptarëve dhe SHBA-së.
Në përfundim të fjalës së tij, ai u shpreh se shqiptarët presin pafajësinë e Hashim Thaçit, Kadri Veselit, Jakup Krasniqit dhe Rexhep Selimit, si dhe kthimin e tyre pranë familjeve dhe popullit të Kosovës.
“Zoti e bekoftë Kosovën, Shqipërinë dhe gjithë shqiptarët kudo që ndodhen. Zoti e bekoftë UÇK-në, luftëtarët, dëshmorët dhe veteranët e saj. Zoti e bekoftë miqësinë e përjetshme të shqiptarëve me Shtetet e Bashkuara të Amerikës”, përfundoi Hajdari.