Dinamo pritet të zyrtarizojë gjatë ditës së sotme dy përforcime të rëndësishme për skuadrën. Saliou Sembene dhe Andi Hadroj kanë kaluar me sukses testet mjekësore dhe tashmë janë gati të hedhin hapin e radhës, duke u bërë zyrtarisht pjesë e bluve.
Të dy futbollistët pritet të jenë në dispozicion të trajnerit Ilir Daja për ndeshjen e radhës, edhe pse fizikisht do t’u duhet pak kohë për të arritur ritmin optimal të skuadrës.
Afrimet e reja pritet të rrisin ndjeshëm konkurrencën dhe alternativat në grup. Sembene dhe Hadroj e njohin mirë kampionatin shqiptar, pasi së fundmi kanë qenë pjesë e Partizanit, ku u dalluan me paraqitjet e tyre.
Sembene u largua gjatë verës nga të kuqtë, por vendosi të vijojë karrierën në Shqipëri, ndërsa Hadroj rikthehet në kampionat pas eksperiencës në Ukrainë. Ky i fundit pritet të jetë një alternativë e rëndësishme në krahun e djathtë të mbrojtjes.
Ndërkohë, Dinamo përgatitet për sfidën e radhës ndaj Laçit. Ndeshja do të luhet të shtunën, në orën 18:30, në “Elbasan Arena”, me blutë që synojnë fitoren e katërt radhazi.