Ministri i Mbrojtjes, Ermal Nufi, ka kërkuar forcimin e masave parandaluese dhe të standardeve të sigurisë nga zjarri, duke theksuar se mbrojtja civile nuk duhet të fokusohet vetëm te reagimi pas emergjencave.
Gjatë hapjes së konferencës ndërkombëtare “Tirana Fire Safety 2026”, që po zhvillohet në Tiranë me pjesëmarrjen e ekspertëve, institucioneve publike, akademisë dhe përfaqësuesve të industrisë së ndërtimit e teknologjisë, Nufi tha se siguria duhet të planifikohet që në fazën e projektimit të ndërtesave.
“Nuk mund ta ndërtojmë mbrojtjen civile vetëm mbi reagimin. Ne duhet të jemi po aq të fortë në parandalim, sa ç’jemi edhe në reagim”, deklaroi ministri.
Duke iu referuar zhvillimit të shpejtë urban dhe ndërtimit të strukturave gjithnjë e më komplekse, Nufi nënvizoi nevojën për rritjen e standardeve të sigurisë nga zjarri.
“Sigurinë s’mund ta marrim si të mirëqenë dhe siguria s’mund të jetë asnjëherë një mendim i mëvonshëm. Ajo duhet të projektohet që në fillim!”, u shpreh ai.
Ministri bëri të ditur se, deri më 9 shtator 2026, sistemi i mbrojtjes civile është përballur me 81 raste zjarresh masive, të cilat kanë kërkuar angazhimin e më shumë se 14,600 forcave, rreth 1,350 mjeteve tokësore dhe janë realizuar 180 operacione ajrore.
Sipas Nufit, pas këtyre shifrave qëndrojnë orë të gjata pune dhe sakrifica të forcave dhe strukturave të ndryshme të angazhuara në përballimin e emergjencave.
Ai vlerësoi angazhimin e Forcave të Armatosura, shërbimeve zjarrfikëse, pushtetit vendor, Policisë së Shtetit, shërbimeve pyjore, administratave të zonave të mbrojtura dhe vullnetarëve.
“Pas këtyre shifrave janë njerëz, orë pune, sakrifica dhe një përpjekje e përbashkët e Forcave të Armatosura, shërbimeve zjarrfikëse, strukturave të pushtetit vendor, Policisë së Shtetit, shërbimeve pyjore, administratave të zonave të mbrojtura, vullnetarëve dhe të gjithë aktorëve të tjerë të sistemit”, tha Nufi
Ministri theksoi se sistemi i mbrojtjes civile, në zbatim të ligjit për mbrojtjen civile, vendos në qendër zvogëlimin e riskut, parandalimin, gatishmërinë, koordinimin dhe aftësinë ripërtëritëse të komuniteteve.
Në konferencë u nënvizua gjithashtu rëndësia e bashkëpunimit mes institucioneve publike, ekspertëve dhe sektorit privat. Sipas ministrit, siguria nga zjarri kërkon standarde të qarta, projektim të sigurt, zbatim korrekt, inspektim efektiv dhe përdorim të teknologjive moderne.
