Kryetari i PD, Sali Berisha thotë se zhvillimet e fundit politike dhe protesta kanë sjellë një situatë të re në vend. Gjatë deklaratës së tij në bashkëbisedimin me ndjekësit, Berisha iu referua denoncimeve të opozitës ndaj qeverisë, duke e cilësuar protestën e zhvilluar prej më shumë se 100 ditësh si një nga faktorët kryesorë që, sipas tij, ka dëmtuar imazhin e qeverisë.
“Pa diskutim qëndrimet e opozitës, nuk duhet të harroni se janë tetë rezoluta ndërkombëtare, të cilat denoncojnë publikisht narkoshtetin, farsën zgjedhore të Edi Ramës, shtypjen e të drejtave kushtetuese të opozitës dhe burgosjet politike”, u shpreh Berisha. Ai shtoi se protesta ka pasur një ndikim të rëndësishëm në përballjen politike me qeverinë.
“Protesta e fuqishme, që ka kaluar 100 e sa ditë, ka damkosur më shumë se çdo gjë tjetër regjimin e Edi Ramës”, tha kryedemokrati. Berisha u ndal edhe te e ardhmja e Partisë Demokratike, duke kërkuar një proces të gjerë ripërtëritjeje brenda forcës politike. Sipas tij, ndryshimet nuk duhet të kufizohen vetëm te drejtuesit, por të përfshijnë mënyrën e funksionimit të partisë.
“Partia Demokratike duhet të bëjë gjithçka për ripërtëritjen e saj. Dhe këtu nuk është fjala e ripërtëritjes vetëm të drejtuesve, por ripërtëritja është një koncept shumë i gjerë”, deklaroi Berisha. Ai theksoi nevojën për modernizim dhe dixhitalizim, duke argumentuar se PD duhet të përshtatë mënyrën e funksionimit me problematikat e vendit.
“Në radhë të parë funksionimin e saj, modernizimin, dixhitalizimin e saj, vizionin e saj për t’u dhënë përgjigje më të sigurt, më të shpejtë të gjithë këtyre problematikave të mëdha”, tha ai. Në përfundim, Berisha deklaroi se opozita duhet të fokusohet te rikthimi i besimit të qytetarëve, duke e cilësuar Edi Ramën si “të shkuarën”.