Kosova mund të përballet me zgjedhje të parakohshme parlamentare në nëntor, nëse Kuvendi nuk arrin të zgjedhë presidentin e vendit brenda afatit të përcaktuar nga Gjykata Kushtetuese.
Sipas vendimit të publikuar nga Gjykata Kushtetuese, procedura për zgjedhjen e presidentit ka nisur më 8 gusht dhe afati 60-ditor për përmbylljen e saj skadon më 6 tetor.
Në rast se deri në këtë datë deputetët nuk arrijnë të zgjedhin presidentin, Kuvendi duhet të shpërndahet, duke i hapur rrugë zgjedhjeve të reja parlamentare.
Kushtetuta përcakton se zgjedhjet duhet të zhvillohen brenda 45 ditësh nga shpërndarja e Kuvendit. Nëse shpërndarja ndodh më 6 tetor, zgjedhjet duhet të mbahen jo më vonë se 20 nëntori.
Duke qenë se zgjedhjet në Kosovë zhvillohen zakonisht të dielave, 15 nëntori paraqitet si një nga datat e mundshme për mbajtjen e zgjedhjeve të parakohshme.
Kështu, 6 tetori mbetet data kyçe: nëse Kuvendi nuk arrin të zgjedhë presidentin deri atëherë, vendi mund të rikthehet në proces zgjedhor.